Angalanermut katerisimaartarnernullu killilersuinerit pillugit nalunaarutit nutaat

Ullumikkut Kalaallit Nunaannut nunatsinnilu angalanermi piumasaqaatit kiisalu katerisimaarnernut il.il. killilersuigallarnerit pillugit nalunaarutit nutartikkat atuutilersinneqarput.

Kalaallit Nunaannut angalaneq pillugu nalunaarut
Kalaallit Nunaannut angalaneq pillugu nalunaarutip piffissami sorlermi atuutilissaneranik taamaallaat nutarterisoqarpoq.

Kalaallit Nunaannut angalaneq pillugu nalunaarut Naalakkersuisut qarasaasiakkut nalunaaruteqarfianni atuarneqarsinnaavoq.

Katerisimaartarnernut killilersuinerit pillugit nalunaarut
Katerisimaartarnernut killilersuinerit pillugit nalunaarummi annikitsualunnik naqqiissuteqartoqarnikuuvoq kiisalu nalinginnaanerusunik sakkukilliliisoqarluni.

Illup iluani aaqqissuussinerni peqataasinnaasut 100-nut killilersorneqarnerat aammalu silami aaqqissuussinerni 250-inut killilersorneqarnerat atorunnaarsinneqarput.

50-it sinnerlugit peqataasoqartillugu aaqqissuussanik ingerlatsinermi, matumani kommuninit allanit inunnik peqataasoqarfiusuni, Nunatta Nakorsaaneqarfianit akuerineqarnissamut qinnuteqartarneq pisariaaruppoq. Paarlattuanik aaqqissuisoq aaqqissuussap ingerlanneqarnissaanut allakkatigut periusissiussaaq aammalu piumasaqaatit sisamat tulliuttut malinneqarnissaat qulakkiissavaa:
  1. Atortut attorneqarsinnaasullu, peqataasunit arlalinnit attorneqartut, pisariaqartitsinermik naliliineq malillugu sapinngisamik akulikitsumik tunillannartuiaammik tagiarneqassapput, taamaattorli sivikinnerpaamik akunnerit marluk allorlugit.
  2. Inuit, Covid-19-imik tunillatsissimanermik ersarittumik ersiuteqarpata, aaqqissuussanut il.il. peqataatinneqaqqusaanngillat.
  3. Aaqqissuussap il.il. ingerlanneqarnissaanut tamanna aporfiussanngippat, peqataasut minnerpaamik imminnut 2 meterinik ungasissuseqassapput.
  4. Aaqqissuussami il.il. peqataasut Covid-19-imik tunillatseratarsinnaanerannik pasitsaassaqartoqarpat, taava Corona pillugu Allattoqarfik piaartumik attavigineqassaaq.
"Allakkatigut malitassat" ima paasineqassapput, aaqqissuussap aallartinnginnerani aaqqissuisoq ataatsimik arlalinnilluunniit allagaqaasiussaaq, tassani aaqqissuussap ingerlanneqarnissaanut atatillugu piumasaqaatit sisamat qanoq ilillugit

qulakkeerniarneqarnersut allaaserineqassallutik. Assersuutigalugu suut tunillannartuiarneqassanersut, kina tunillannartuiaassanersoq qaqugukkullu pisassanersoq allassimassapput.

Katerisimaartarnernut killilersuinerit pillugit nalunaarut Naalakkersuisut qarasaasiakkut nalunaaruteqarfianni atuarneqarsinnaavoq.

Paasissutissat allat pissarsiariniaraanni:
- immikkoortortaqarfimmi pisortaq Martin Pedersen mrpd@nanoq.gl-ikkut imaluunniit oqaras.: +299 34 66 18-ikkut attavigineqarsinnaavoq.
- Corona pillugu Allattoqarfik corona@nanoq.gl-ikkut, imaluunniit oqaras.: +299 80 11 00-ikkut attavigineqarsinnaavoq.