Meerartaarnermut atatillugu sulinngiffeqarnermut aningaasaateqarfiup siulersuisuinut ilaasortassaanik inassuteqarnissamut aggersaaneq

Namminersortuni akissarsiaqartunut meerartaarnermut atatillugu sulinngiffeqarnermut aningaasaateqarfimmi siulersuisuinut ilaasortassaanik inassuteqarnissamut aggersaaneq.

Naartunermi, erninermi meeravissiartaarnermilu sulinngiffeqartarneq pillugu Inatsisartut inatsisaat nr. 5, 19. november 2020-imeersoq naapertorlugu meerartaarnermut atatillugu sulinngiffeqarnermut aningaasaateqarfimmik pilersitsisoqassaaq. Meerartaarnermut atatillugu sulinngiffeqarnermut aningaasaateqarfik ulloq 1. juuli 2021 atuutilissaaq siulersuisuniillu aqunneqassalluni.

Siulersuisunut ilaasortassanik toqqaasarneq pillugu Inatsisartut inatsisaanni allassimavoq: “akissarsiaqarlutik sulisunut kattuffiit inassuteqarnerat tunngavigalugit ilaasortat marluk toqqarneqassapput” aamma “sulisitsisunut kattuffiit inassuteqarnerat tunngavigalugit ilaasortat marluk toqqarneqassapput”. Siulersuisuni kikkut ilaasortaatikkusunnerlugit sulisitsisut akissarsiaqarlutillu sulisut kattuffii tamanna tunuliaqutaralugu inassuteqassapput.

Kalaallit Nunaanni akissarsiaqarlutik sulisunut sulisitsisunullu kattuffiit ilaasortassatut piukkussaminnik sukkanerpaaq atorlugu kingusinnerpaamillu ulloq 20. apriili Isumaginninnermut, Ilaqutariinnut Inatsisinillu Atuutsitsinermut Naalakkersuisoqarfimmut inassuteqarnissaat innersuussutigineqarpoq Inassutit uunga nassiunneqassapput: iian@nanoq.gl cc: betd@nanoq.gl.