Inatsisartunut qinersinermi taasivissat taasiartorfissani tamaginni tiguneqareerput

Inatsisartunut qinersinissamut taasivissat taasiartorfissani tamaginni maannakkut tiguneqarsimalersut, marlunngornerup ualisoq TELE-POST-ip uppernarsarsinnaa-lersimavaa. Taasivissat marlunngorneq ulloq 6. april qinersinermi atorneqartussat tassani pineqarput.

Taamaalilluni ullunit unnuanillu qulinit sivikinnerusumi Nuummiit nunatsinni inoqarfinnut 72-nut tamaginnut allakkat anngussimapput.
- Taamatut angusaqarneq TELE-POST-ip, Air Greenlandip, kommunit Naalakkersuisullu maligassaqqissumik suleqatigiinneranni pisinnaasimavoq, oqarpoq Klaus Georg Hansen, Nunamut Namminermut Immikkoortortaqarfimmi immikkoortortaqarfimmut pisortaq, Inatsisartunut qinersinissamut piareersaanermut akisussaasuusoq.

- Ukioq manna taasivissanik nassiussineq immikkut unammilligassartaqarsimavoq. Corona-mut tunngatillugu killilersuinerit aammalu påskernissaa pissutigalugit nalinginnaasumik pisartunit timmisartuussinerit ikinnerusimapput. Tamatuma saniatigut Air Greenlandimi teknikki silarlunnerani sumiiffini arlalinni unammilligassaqartitsisimapput, oqaluttuarpoq Susanne Kristensen, Nuummi TELE-imi sullissivimmi pisortaq.
Susanne Kristensen ukioq manna taasivissat naasiussorneqarnerannik ataqatigiissaarinermut nakkutiginninnermullu pingaarnertigut akisussaasooqqippoq.

Suleqatigisat akuusut nutaaliornermik eqqarsartariaqarsimapput. Assersuutigalugu taasivissat ilai sikukkut qamuteralannik biilinillu anngutsinneqarput.
Air Greenlandimi Cargo Sales Manager Heinrich Duko Sørensen paasissutissiivoq, Air Greenland TELE-POST qanimut suleqatigalugu timmisartuussinissamut pilersaarutini annikinnerusunik allanngortitsisimasoq, taamaalilluni allakkat taasivissanik imallit orni-gassanut akunniffissaminnut tikiunneqareerneranni sukkasuumik aqqummut ingerlaqqiffissaannut anngutsinnissaat qulakkeerneqarsinnaasimalluni.

Maannakkut qinersisartut allakkatigut taasisimanngitsut marlunngorneq ulloq 6. april taasivissamut krydsiliiniarlutik nunatsinni taasiartorfissanut 72-nut orniguppata, taasivissat atorneqarnissamut utaqqisiinnarneqartussanngorput.

- - -

Paasissutissanik annertunerusunik piniarnermi attaveqarfissaq: Klaus Georg Hansen, oqarasuaat angallattagaq 54 73 46, mail kgh1@nanoq.gl