Nipisannik tuniniaaneq inerteqqutaavoq

Aalisarnermut, Piniarnermut Nunalerinermullu Naalakkersuisoqarfiup aamma Kalaallit Nunaanni Aalisarsinnaanermut Akuersissutinik Nakkutilliisoqarfiup erseqqissarusuppaa nipisanniarneq maannamut suli ammaanneqanngimmat, taamaattumik nipisannik tuniniaaneq inerteqqutaavoq imaluunniit nipisat suaannik. Taamaammat nipisannik aamma nipisat suaannik kalaaliminerniarfinni, neriniartarfinni aamma facebookikkut tuniniaallunilu pisinissaq inerteqqutaavoq.

Nipisannik nipisalluunniit suaannik tuniniaallunilu pisineq maleruagassanik unioqqutitsineruvoq, akiliisitsisoqarsinnaalluni.

Nipisanniarneq pillugu Namminersorlutik Oqartussat nalunaarutaat normu 2, 2. februar 2016-imeersoq naapertorlugu Aalisarnermut, Piniarnermut Nunalerinermullu Naalakkersuisoqarfiup aqutsiveqarfinni ataasiakkaani nipisanniarnissaq aallarteqqusinnaavaa sumiiffinni tunisaqarnissamut sinniisuutitat aamma aalisartut kattuffiat isumaqatigiissuteqarfigereerlugit.

Aalisarnermut, Piniarnermut Nunalerinermullu Naalakkersuisoqarfik sumiiffinni tunisaqarnissamut sinniisuutitanit aamma aalisartut kattuffiannit nipisanniarnissap ammaneqarnissaanut tunngasumik maannamut suli saaffigineqarsimanngilaq, taamaammat aqutsiveqarfinni nipisanniarnissamik maannamut ammaasoqanngilaq.

Nipisanniarnissamut piffissaliunneqartoq avaqqullugu inuussutissarsiutigalugu aamma sunngiffimmi nipisanniarneq inerteqqutaavoq.
Nipisanniarnerup nalaani inuussutissarsiutigalugu aalisartut kisimik tuniniaasinnaatitaapput.

Aalisarnermut, Piniarnermut Nunalerinermullu immikkoortortaqarfimmi pisortaanerugallartoq, Katrine Kærgaard, annerusumik paasiniaavigineqarsinnaavoq. E-mail: katk@nanoq.gl