DMI Facebook-ikkut kalaallisut silassartarnermik nutaamik aallartitsilersoq

Ineqarnermut Attaveqaqatigiinnermullu Naalakkersuisoqarfiup nuannaarutigalugu oqaluttuarisinnaavaa, DMI silassaq pillugu nalunaarutit nutaamik, kalaallinut atuisunut sammitinneqartunut aallartitsilermat. Tassani Facebook-ikkut nittartagaq pineqarpoq, tassanilu silassaq ullormoortumik danskisut kalaallisullu takuneqarsinnaalissaaq.

 

Kalaallit Nunaanni innuttaasut Facebook-imik atuinerpaasarmata, atuisut Facebook-imik nalinginnaasumik atuinerminni silassamik takunnissinnaanermut periarfissaqalernissaat isumalluarnartorujussuuvoq. Taamaalilluni innuttaasut silap, soorlu imaatigut angalanermut atatillugu ulorianartorsiortitsisinnaasup qanoq innissaanik eqqumaffiginnissinnaanerat annertusissasoq ilimanaateqarpoq.

 

"DMI-p Facebook-ikkut suliniutaa pissanganartorujussuuvoq. Kalaallit Facebook-imik atuisut maanna DMI-p silamik silallu pissusianik ilisimasarpassuinik takunnissinnaalernissaat nuannaarutigisorujussuuarput", Kenneth Lund Bøjler, Kalaallit Nunaani Ineqarnermut Attaveqaqatiginnermullu Naalakkersuisoqarfimmi immikkoortortamut pisortaq oqarpoq.

 

Aallaqqaammut piterarnissaanut aarlerisaarutit immikkut eqqumaffigineqassapput, kisiannili ukiup qanoq ilinera apeqqutaatillugu silap pissusiinut nutaanut naleqqussaasoqartassaaq.

 

DMI-p Facebook-ikkut quppernera, Kalaallit Nunaannut immikkut tunngatinneqartoq nassaariuk, uani:

 

https://www.facebook.com/DMI-Gr%C3%B8nland-100402065440320

Annertunerusumik paasisaqarusunnermi Ineqarnermut Attaveqaqatigiinnermullu Naalakkersuisoqarfik attaveqarfigineqassaaq, uunga box909@nanoq.gl