Paasissutissiineq Qinersisoqarnissaanik suaaruteqareernerup kingorna Naalakkersuisut atorfii

Inatsisartunut immikkut ittumik qinersisoqarnissaa ulloq 6. april 2021-imut suaarutigineqarpoq, taamaattumillu Inatsisartut nutaat qinerneqareerpata Naalakkersuisussanik nutaanik toqqaanissaasa tungaanut Naalakkersuisut Naalakkersuisuugallassapput.

Naalakkersuisut politikkikkut sulianut akisussaasuupput, Inatsisartunulli qinersisoqartussanngortillugu Naalakkersuisut naalakkersuinermi atuuffii allanngortarput. Naalakkersuisuugallartut pissutsit politikkikkut aalajangiiffigisinnaanngilaat, soorlu atorfilittat allaffissornikkut aalajangiiffigisassanik annertuunik tunngaviatigut aalajangiussaqarsinnaanngitsut.

Naalakkersuisuugallartut susinnaappat susinnaanngillallu

Naalakkersuisuugallartut pisinnaatitsissutigisimasatik tunngavigalugit sulinertik nangissavaat ingerlatsinerullu akornuteqannginnissaa qulakkiissallugu. Atorfilittat Naalakkersuisunut sullissinerat qinersinissap suaarutigineqarnerata kingorna politikkikkut sunnertissimassanngilaq. Tamanna atorfilittat ataatsimiitsillugit atuupportaaq, suliaq ataatsimiinnerluunniit apeqqutaatillugu politikkikkut isummertoqartariaqanngippat.

Tusagassiorfinnit tusagassiorfinnullu saaffiginninnerit Naalakkersuisoqarfimmi pisortakkuussapput. Suliffeqarfinnik, kattuffinnik, innuttaasunik il.il. attaveqaqatigiinnerit pisarnerisut nalinginnaasumik akineqartassapput.

Inatsisartut inatsisissaannut, nalunaarutinut, nassuiaatinut il.il. siunnersuutinik tamanut nutaanik tusarniaasoqassanngilaq. Tusarniaassutit nassiunneqareersut piffissaliussat naapertorlugit naammassineqassapput.