Naalakkersuisut Natuk Lund Olsen Nunalerineq pillugu Siunnersuisooqati-giinnut siulittaasussatut toqqarpaat

Nunalerineq pillugu Siunnersuisoqatigiit Qaqortumi Natuk Lund Olsen siulittaasoralugu qanittukkut ataatsimiipput. Siunnersuisoqatigiinni siulittaasuusimasoq Carl Frederiksen siulittaasutut januaarimi tunuartoq Natup taarserpaa.

Nunalerineq pillugu Siunnersuisooqatigiit nuannaarutigaat nunalerineq pillugu periusissiaq 2021-mit 2030-mut atuuttussaq naammassineqarsimammat. Taanna 2030-p tungaanut atuuttussaasoq siunnersuisoqatigiinnit iluarisimaarneqarpoq, periusissiami anguniakkat suleqataaffigissallugit aamma qilanaarineqarlutik.

Nunalerineq pillugu Siunnersuisoqatigiit ataatsimiinnerminni ulluinnarni aqutsisussanik pilersitsipput. Ulluinnarni aqutsisussat nunatsinni nunalerinerup siuarsaavigineqarneranut suleqataassaaq, nunatta nerisassanik nammineerluni pilersorneqarnerulernissaanut siuarsaaqataassalluni.

Ataatsimiinnermi aamma ataatsimiititaliaq misileraanermut tunngasumik sammisaqartussaq Savaatillit Peqatigiit Suleqatigiissut suleqatigalugit pilersinneqarpoq, taassuma Uperviarsummi ineriartortinneqartut siuarsaavigalugillu suleqataaffigissavai.

Natuk Lund Olsen Ilisimatusarfimmi inuiaat kulturiat oqaluttuarisaanerallu ilinniagaraa bacheloritut naammassisimallugu aamma Aarhusip universititiani inuup inuiaqatigiillu pissusiinik misissuisutut, antropologitut, aamma politikkip oqaluttuarisaaneranik kandidatitut ilinniarsimasutut naammassisimasaqarpoq. Natuk Ilisimatusarfimmi nunatsinni nerisassat pillugit Ph.d-mik naammassisaqarniarluni maannakkut ilinniagaqarpoq.

Natuk Lund Olsenip Aalisarnermut, Piniarnermut Nunalerinermullu Naalakkersuisoqarfimmi sulisut peqatigalugit ilaatigut Kommune Kujalleq, Innovation South Greenland, aamma Neqi A/S-ip pisortaa ataatsimeeqatigai, oqaluuserineqartarlutik nunatsinni nunalerinerup suleqatigiilluni siuarsarnissaanut periarfissaasinnaasut.

Paasissutissanik suli allanik, uani taaneqanngitsunik pissarserusukkaanni Aalisarnermut, Piniarnermut Nunalerinermullu Naalakkersuisoqarfimmut saaffiginnittoqarsinnaavoq, e-mail: apnn@nanoq.gl

Sukumiinerusumik paasisaqarusukkaanni Nunalerinermi immikkoortortaqarfimmi pisortaq Pollas Lyberth 34 53 02, e-mail:poly@nanoq.gl attavigineqarsinnaavoq.