Qilalugarniarnermi malittarisassat malinneqassapput

Naalakkersuisoqarfik ilisimatinneqarpoq qaqortanik qilalugarniarnermi mattaannai kisiisa piniarfimmiit pilaffimmiillu tiguneqartartut, neqaalu qimaannarneqartarsimasut. Naalakkersuisoqarfiup peqqussutigaa qilalukkanut qaqortanut qernertanullu nalunaarummi aalajangersakkat malinneqassasut. Sisimiut Maniitsullu eqqaani qaqortarniarneq unioqqutitsinerullunilu pissuserissaarnerunngilaq.

 

Namminersorlutik Oqartussat qilalukkat qaqortat qernertallu pillugit nalunaarutaani § 19-imi piumasaqaataavoq nerineqarsinnaasut tamaasa angerlaanneqartassasut:

  § 19.  Qilalugaq nunamut sikumulluunniit qaqiinnavillugu pilanneq aallartinneqassaaq. Nerisassartai atorneqarsinnaasullu allat tamarmik angerlaanneqarlutilluunnit qimatulineqassapput. Pilaffiusimasoq perlukuiarneqarsimassaaq. 

  Imm. 2.  Iliveqqiviit najukkami piniarnermut aalisarnermullu nakkutilliisumut kommunilluunniit allaffianut nalunaarutigineqassapput.

  Imm. 3.  Taamaallaat angallatit, angallatip angissusianut tamakkiisumut uppernarsaat malillugu 15 meterinik t.t.-mik takissusillit taannaluunniit inorlugu angissusillit angallatip nammineq pisaanik pilaffigineqarsinnaapput.

 

Taassuma saniatigut malugeqquneqarpoq:

 

  § 21.  Qilalukkat qaqortat qernertallu pisat, tassanilu ilaapput akuerineqaqqaareersumi sassinermi pisat, tunineqassanngillat kommunimi imaluunniit nunaqarfimmi allaffik akuersissummik naqissusiinikkut ullulerlugu pisamik nalunaarsuereertinnagu.
  Imm. 2.  Qilalukkat qaqortat qernertalluunniit unioqqutitsinikkut pisarineqarsimasut mattaannik, neqaannik aamma kigutaannik (tuugaavinik) pisineq, tunisineq imaluunniit pissarsineq inerteqqutaavoq.

  Imm. 3.  Pisarineqartumit taassumaluunniit ilaanit tunisineq imaluunniit pisineq aatsaat pisinnaavoq akuersissummik piginnittup akuersissutip assilinerani uppernarsarlugu atsiorpagu. Taanna tuniniaasoqartillugu qinnuigineqarnikkut takutinneqarsinnaassaaq. Assilinerani takuneqarsinnaassaaq pisap kommunimi oqartussaasumit nalunaarsorneqarsimanera.
  Imm. 4.  Taamaattoq kommunip allaffia nunaqarfimmiluunniit allaffiup ammanerisa avataatigut tuniniaaneq ingerlanneqarsinnaavoq, allaffik ammarniariartoq nalunaarsuisoqarsinnaappat.

 

 

 

Sukumiinerusumik paasisaqarusukkaanni immikkoortortaqarfimmi pisortaq Amalie A. Jessen attavigiuk, oqarasuaat 34 53 04, e-mail: amalie@nanoq.gl