Inatsisartunut qinersinissamik nalunaarut

Inatsisartunut immikkut ittumik qinersineq pillugu Inatsisartut inatsisaat nr. 1, 17. Februar 2021-imeersoq naapertorlugu inatsisartunut qinersinissap ullussaa aalajangerneqarpoq pissasoq:

Marlunngorneq 6. april 2021

Partiit ullormi qinersinissamik suaarutiginninnermi Inatsisartuni ilaasortaatitaqanngitsut, qinersinermullu qinigassanngortitsiniartut qinersisartunik nalunaarutigineqartunik Kalaallit Nunaanni Inatsisartunut qinersisarneq pillugu Inatsisartut inatsisaanni § 12-mut (Inatsisartunut qinersisarneq pillugu inatsiseq) naammassinnittut 936-inik katersisimassapput.

Inatsisartunut qinersisarneq pillugu inatsiseq, § 12 Imm. 4 naapertorlugu. Partiimik nalunaarutiginninneq qinersisartut partiimik nalunaarutiginnittut uppernarsaatitut allagaannik ilaqartinneqartassaaq. Uppernarsaatitut allakkami ilanngullugit nalunaarutigineqartassapput qinersisartut aqqi tamakkiisut, ullut inunngorfii sumilu najugaqarneri aammalu qinersisartunit namminernit atsiugaallutillu ulluligaasimassallutik. Taakkua saniatigut uppernarsaatitut allakkani ilanngullugu allassimasassaaq qinersisartut Inatsisartunut qinersisinnaanermut piumasarineqartunik naammassinnissimaneri pillugu inuit aqqinik nalunaarsuiffimmi pineqartumi pisortaasup uppernarsaataa atsiugaq.

Uppernarsaatitut allakkat nalunaarutiginninneq ukiumik ataatsimik sinnerluguluunniit sioqqullugu allanneqarsimasut naatsorsuutigineqarsinnaanngillat. Taamaapportaaq partii ataaseq sinnerlugu nalunaarutiginninnermi qinersisartut uppernarsaatitut allagaannut tunngatillugu. Atsiornerit Qinersinermut Ataatsimiititaliap allattoqarfianut tunniunneqareersimassapput, kingusinnerpaamik:

Marlunngorneq 2. marts 2021

Qinersinermut inatsisip §§ 13-17 naapertorlugu Inuit qinigassanngortissinnaatitaasut partii sinnerlugu imaluunniit kisimiillutik qinigassanngortittut, kattusseqatigiinniluunniit qinigassanngortittutut Inatsisartunut qinigassanngortissinnaapput. Kisimiilluni qinigassanngortissinnaassagaanni qinigassanngortitsisut ikinnerpaamik 40-nik amerlassuseqassapput.

Qinersinermut inatsisip § 17-iat naapertorlugu nalunaarummi allassimassapput qinigassanngortitsisut tamarmik immikkut aqqi, inuuii, atorfii najugaallu. Qinigassanngortitsisut ilaat ataaseq nalunaarut pillugu qinigassanngortitsisut tamaasa sinnerlugit saaffiginnissuteqarfigineqarsinnaasutut allassimassaaq.

Inatsisartunut qinersinissamut qinigassanngortittussanik nalunaarutiginninneq kommunimi qinersinermik siulersuisunut kingusinnerpaamik tunniunneqassaaq:

Marlunngorneq 16. marts 2021
nalunaaqutaq 12:00


Nuuk, 17. februar 2021
Hans-Peder Barlach Christensen
Qinersinermut Ataatsimiititaliami siulittaasoq / Formand for Valgnævnet