Suli mittarfiliortiternerit ingerlateqqinneqarnissaminnut nukissaqarfiulluarput

Kalaallit Airports International (KAIR INT) pillugu Sanaartornermut Ataatsimiititaliap tusagassiorfinnut nalunaarutaa 16. februar 2021-meersoq soqutigalugu atuarpara, tassanilu mittarfiliortiternermi aningaartuutaanerusussat amerliartornerannut annilaangassuteqartoqartoq oqaatigineqarpoq.

Annilaangasoqartoq paasilluarsinnaavara. Tassami ANINGAASARPASSUIT atorlugit matumani sulisoqarpoq, taamaattumillu annilaangassuteqarneq pissusissamisoorluinnarpoq. Allatut isumaqartoqassappat tamanna akisussaassuseqannginneruvoq.

Tamannarpiaq peqqutigalugu KAIR INT-p niuernermut aningaasalersuinermullu pilersaarummik nutarterinera pillugu Naalakkersuisunut ilisimatitsissummik suliaqarpunga. Taanna Naalakkersuisunut saqqummiunneqareerpat, ilisimatitsissummik Aningaasaqarnermut Akileraartarnermullu Ataatsimiititaliamut kiisalu Sanaartornermut Ataatsimiititaliamut ilisimatitsissummik nassiussisoqassaaq.

Ilisimatitsissutinni ilaatigut allappunga, KAIR INT 2020-ip ingerlanerani suliassanut suli neqerooruteqartitsivigineqanngitsunut missingersuutini iluarsaassimagai. Suliffeqarfik akisussaassusilik taamaaliortussaavoq.

Tassalu KAIR INT piffissaagallartillugu niuernermut aningaasalersuinermullu pilersaarut, aningaasartuuteqarnerusoqassanersoq, kiisalu aningaasartuuteqarnerusoqassappat aningaasalersuisoqarsinnaassanersoq pillugu nassuiaateqarfiusoq nutarterpaa.

Niuernermut Aningaasalersuinissamullu pilersaarut nutartigaq

KAIR INT 2021-mi januaarimi Nuummi Ilulissanilu suliassanut niuernermut aningaasalersuinermullu pilersaarutit nutarterpai. Suliassat suli niuernikkut peqqissorujussuartut naliliiffigineqarput. Tamatuma kingunerisaanik COVID-19 peqqutaalluni ilaasussat amerlassusii tunngavigalugit, kiisalu sanaartornerni kinguaattoorutissat nalornissutigineqaraluartut, siunissami sinneqartuungaatsiarnissamut tunngavissaqarpoq.

 

Nuummi Ilulissanilu mittarfiliortiternerit 2018-imi missiliukkanut naleqqiullutik akisunerussasut naatsorsuutigineqarpoq, tamannali niuernermut aningaasalersuinermullu pilersaarummut isumannaatsumut, 2021-mi naatsorsuiffigeqqinneqartumut nikisitsinngilaq. Tassalu aningaasartuutit amerlissutissaasa avataanit taarsigassarsilluni, imaluunniit Nationalbanken-imit taarsigassarsilluni, taamaalillunilu piginnittut aningaasaleeqqinnatik aningaasalersorneqarsinnaanissaannut tunngavissaqarluarpoq.

Ilaasussanik missiliuineq

KAIR INT-p ASM-Global COVID-19-ip ingerlatseqatigiiffimmi ilaasussanik missiliuinermut kingunerisassaanik naliliisippaa.

 

ASM-Global-ip missiliuinerani najoqqutassiamut atorneqartumut naleqqiullugu sukkanerusumik pissutsinut “nalinginnaasunut” utertoqassasoq ilimagineqarpoq. Pissutsinut ”nalinginnaasunut” 2024/25-mi uternissaq ASM-Global-imit naatsorsuutigineqarpoq, kiisalu niuernermut pilersaarummi nutartikkami 2026-miit pissusiusimasunut uternissaq naatsorsuutigineqarluni. 2026-miit ilaasussanik missiliuinermi siullermi qaffaatissatut taaneqartut atorneqarput.

COVID-19-ip atuunnera peqqutaalluni 2020-mi angallannerit annikilleriarput, kisiannili 2025-imi angallannerup siornatigutut annertussuseqaqqilereernissaa naatsorsuutigineqarpoq. Kisianni niuernermut aningaasalersuinermullu pilersaarummi malussajassutsimut naatsorsuisoqareerpoq, taakkunanilu ilaasartut ikileriarnerisa sunniutissaat takutinneqarput. Ataatsimut isigalugu ASM-Global-ip ilaasussanut amerlassusiliussai najoqqutassiamut ilanngunneqarpata kaaviiaartitat qaffattussaapput, aammalu mianersortumik isumalluarnissamut tunngavissaqalertussaavoq.

Inerniliinerit

KAIR-ip aningaasanik taarsigassarsiniarnissaa nutaajunngilaq. Tamanna siunnerfiujuarsimavoq. Assersuutigalugu sanaartornermut inatsimmi § 8-i allassimavoq, Naalakkersuisut Inatsisartut Aningaasaqarnermut Akileraartarnermullu Ataatsimiititaliaannit akuerineqarlutik avataaniit Kalaallit Airports A/S-imut taarsigassarsititsisunut qularnaveeqqusiinissamut, imaluunniit tassunga taarsiullugu Nuummi Ilulissanilu nunani tamalaani mittarfinnut aningaasalersuinissamut nunap karsianut taarsigassarsinissamut, aammalu aningaasanik taakkuninnga Kalaallit Airports A/S-imut taarsigassarsititseqqinnissamut piginnaatinneqartut.

 

Nunap karsianiit taarsigassarsititsinissamut qularnaveqqusiinissamut najoqqutassiornissaq suli tikinngilarput. Naatsorsukkani tamani takutinneqarpoq, niuernermut pilersaarut isumannanngitsoq, tassanilu sanaartornermut inatsit, pissutsinik allaaserinnilluarfiusoq innersuussutigeqqissavara.

Suliffeqarfik isumannanngilluinnartumik patajaatsumillu niuernermut pilersaaruteqarpoq, taannalu Kalaallit Nunaata aningaasaqarnerata peqqissuunisaanut, aammalu aningaasaqarnikkut nammineq ingerlanissap anguniarnissaanut iluaqutaassaaq.

Tamanna aamma DTU-p nalunaarusiaani kingullermi, assartuussinermi aningaasaqarnermut tunngasorpiami takuneqarsinnaavoq.

 

Inussiarnersumik inuulluaqqusillunga

 

Karl Frederik Danielsen, Ineqarnermut Attaveqaqatigiinnermullu Naalakkersuisoq

 

Annertunerusumik paasisaqarusunnermi Ineqarnermut Attaveqaqatigiinnissamullu Naalakkersuisoqarfik box909@nanoq.gl aqqutigalugu, imaluunniit Naalakkersuisup allattaa Inuk Kielsen Fleischer ikie@nanoq.gl aqqutigalugu, imaluunniit tlf.: 290320-mut sianerfigalugu attaveqarfigineqarsinnaapput.