Saattuarniarneq pillugu nalunaarut allanngortinneqarpoq

Naalakkersuisut februaarip 11-anni 2021-mi saattuarniarneq pillugu Namminersornerullutik Oqartussat nalunaarutaat normu 8, 7. juni 2004-meersup allanngortinneqarnera akueraat.

Ullutsinnut naleqqunnerusunik aamma innuttaasunut oqartussanullu paasiuminarnerusunik malittarisassiornissaq siunnertaralugu nalunaarummik allannguisoqarpoq.

Nalunaarutit nutarternerinut aqutsinermilu annertunerusumik paasiuminartuutitsinissamik annertusiartortumik isiginninniarnermut atatillugu inatsisilerinermi teknikkikkut allannguisoqarpoq.

Nunatsinni tamarmut iluaqutaasumik nungusaataanngitsumik saattuarniarnissaq qulakkeerniarlugu allannguisoqarpoq.

Nalunaarut saattuarniarnermik ineriartortitsinermi 2021-milu saattuarniarnermi kiisalu siunissamut MSC-mit meqqiliinissamik periarfissaqarnermut qitiuvoq.
Nalunaarut Aalisarnermut, Piniarnermut Nunalerinermullu Naalakkersuisoqarfiup saattuarniarnermik aqutsinermut pilersaarutaanut atatillugu suliarineqarpoq.

Suleqatigineqarlutik Sulisitsisut, Pinngortitaleriffik, Sustainable Fisheries Greenland aamma KNAPK.

Saattuarniarneq pillugu nalunaarummi uku allannguutaapput: Aqutsiveqarfiit marlunnik ilaneqarput, aalisarnermi nutaanik saattuarnialertussanik ukiuni marlunni mattussisoqarluni, aamma aalisariutit 75BRT/120BT-mit anginerusut saattuarniarnermi peqataasinnaanerisa unitsinneqarallarnerat atuutilerluni.

Aamma saattuanut pullatini aniffissiaq igalaasartaq allunaasaq bomuldiusoq atorlugu suliaq atoqquneqarpoq, pullatillu immap naqqani uninngatiinnarneqarnissaannik inerteqqutaavoq.

Aamma periarfissaalerpoq akuersissummik aqutsiveqarfinnut pingasunut atorneqarsinnaasumut qinnuteqarnissaq.

Attavigineqarsinnaavoq: Aalisarnermut, Piniarnermut Nunalerinermullu Naalakkersuisoqarfimmi immikkoortortarmi pisortaq, Emanuel Rosing. E-mail: emro@nanoq.gl