Oqariartuutit isumaqatigiinniarnermi atorneqassapput

Kalaallit inuusuttaasa oqariartuutaat uumassusillit assigiinngisitaarnerannut nunarsuarmi siunnerfiit nutaat pillugit isumaqatiginninniarnermi atorneqassapput

Inuusuttunut uumassusillit assigiinngisitaarnerat pillugu suliaqarluni isumasioqatigiissitsineq – aammalu tamatumunnga nalunaarusiaq saqqummersinneqaqqammersoq – uumassusillit assigiinngisitaarnerannut nunarsuarmi siunnerfiit nutaat pillugit Kina-mi isumaqatiginninniarnissami atorneqassaaq. Naalakkersuisup Jess Svanep inuusuttut suleqatigalugit nalunaarusiaq Kalaallit Nunaanniit oqariartuutinik qitiusunik tallimanik imaqartoq Nunani Avannarlermi Ministerit siunnersuisooqatigiivinut nassiuppaa.

Inuusuttunut uumassusillit assigiinngisitaarnerat pillugu suliaqarluni isumasioqatigiissitsineq ulloq 22. septembari 2020 ingerlanneqarpoq. Uumassusillit assigiinngisitaarnerannut nunarsuarmi nutaanik siunnerfiliinissamut suliap ingerlanerani inuusuttut akuutinnissaat pillugu Nunani Avannarlermi Ministerit siunnersuisooqatigiit suliniutaanni, suliaqarluni isumasioqatigiissitsineq Kalaallit Nunaata ilassutigaa.

”Siorna Nuummi inuusuttunut uumassusillit assigiinngisitaarnerat pillugu suliaqarluni isumasioqatigiissitsinermi aaqqissueqataanissaq uannut pingaaruteqarsimavoq. Inuusuttut nunarsuaq paasisimasaqarfigilluaraat, aammalu nunarsuarmi uumassusillit assigiinngisitaarneranni ajornartorsiorneq pimoorullugu isumanerluutigigaat malunnarpoq. Pinngortitap aammalu uumasut naasullu tassaniittut illersornissaannut akisussaaqatigiinnerput eqqumaffigisorujussuuaat”, Suliffeqarnermut, Ilisimatusarnermut Avatagiisinullu Naalakkersuisoq Jess Svane oqarpoq.

Inuusuttuniit oqariartuutit qitiusut tallimat
Uumassusillit assigiinngisitaarnerat pillugu suliaqarluni isumasioqatigiissitsinermi uumassusillit assigiinngisitaarnerannut, pinngortitamut, avatangiisinut aamma silap pissusaanut tunngasortai peqataasut oqallisigaat. Siunissami periarfissat oqallinnerillu inuusuttunit oqariartuutinik qitiusunik tallimanik inerneqarput, nalunaarusiami tassani atuarneqarsinnaasunik :
  1. Uumassusillit assigiinngisitaarnerat atuarfinni atuartut skiimaanniilissaaq aammalu inuiaqatigiit sinneriniilissalluni.
  2. Inuiaqatigiinni tamaginni pinngortitaq avatangiisillu pillugit suleqatigiinneq annertunerusoq, qujanaq.
  3. Ungasinnerusoq eqqarsaatigalugu eqqarsarit – biologit, aalisartut piniartullu tusaaniartakkit.
  4. Avatangiisinut inatsisit sukannernerusut aammalu unioqqutitsinermi kinguneqartitsisarneq.
  5. Nunani tamalaani suleqatigiinneq pingaaruteqarpoq – nunarsuaq ataaseq inuuffigaarput.
Aichi-mi siunnerfiit atuuffissaat naareerpoq – maannakkut uumassusillit assigiinngisitaarnerannut nutaanik siunnerfiliisoqartussanngorpoq
2020-ip naanerani Naalagaaffiit Peqatigiit uumassusillit assigiinngisitaarnerannut aamma pinngortitamik allanngutsaaliuinermut nunarsuarmut siunnerfii 20-it atorunnaarput. Aichi-mi siunnerfiit, ulluinnarni taamatut taagorneqartut, 2010-imi Naalagaaffiit Peqatigiit uumassusillit assigiinngisitaarnerannut isumaqatigiissutaata – Uumassusillit assigiinngisitaarnerannut nunani tamalaani isumaqatigiissutip – ataani nunanit 196-init atsiorneqarluni akuerineqarput.

Naalagaaffiit Peqatigiit inaarutaasumik naliliinerisa takutippaat nunarsuaq nunarsuarmioqatigiittut siunnerfinni 20-ni tamarluinnagajanni iluatsitsisimanngitsoq, aammalu uumassusillit assigiinngisitaarnerat aamma pinngortitap ataqatigiinneri nunarsuaq tamakkerlugu annertoorujussuarmik tatisimaneqartut. Uumassusillit assigiinngisitaarnerat aamma pinngortitamik allanngutsaaliuineq pillugit nunarsuarmi isumaqatigiissutip nutaap isumaqatigiissutigineqarnissaanut 2021-imi nunarsuarmi nunat Kina-mi Kunming-imi naapittussaapput.

“Inuusuttut oqariartuutaasa tusaaneqarnissaat atorneqarnissaallu pingaaruteqarpoq. Nunarsuarmi pisortat 2021-mi pinngortitaq uumasullu assigiinngissitaarneri pillugit pimoorussiffiusumik isumaqatigiissusiornissaat sorsuutigissavara”, Suliffeqarnermut, Ilisimatusarnermut Avatangiisinullu Naalakkersuisoq Jess Svane oqarpoq.

Inuusuttut oqariartuutaannut suliap ingerlanerata ingerlaqqinnissaa
Inuusuttunut uumassusillit assigiinngisitaarnerat pillugu suliaqarluni isumasioqatigiissitsineq, uumassusillit assigiinngisitaarnerannut aamma pinngortitamik allanngutsaaliuinermut nunarsuarmi nutaanik siunnerfiliinissamut suliap ingerlanerani inuusuttut akuutinnissaat pillugu Nunani Avannarlermi Ministerit siunnersuisooqatigiit suliniutaannut Kalaallit Nunaata ilassutigaa. Nalunaarusiaq inuusuttut oqariartuutaannik qitiusunik tallimanik imaqartoq Nunani Avannarlermi Ministerit siunnersuisooqatigiinnut nassiunneqarpoq.

Paasissutissanik annertunerusunik piniarnermi attaveqarfigineqassaaq Ilisimatusarnermut Avatangiisinullu Naalakkersuisoqarfimmut naalakkersuisoqarfimmi pisortaaneq Mette Skarregaard Pedersen oqarasuaammut: 346476 imaluunniit pan@nanoq.gl.