Peqqinnissaqarfimmut Fast-track’imik aaqqiissummut tunngasoq

Kalaallit Nunaannut tikinnissamut killilersuutinik nassataqarsimasutut coronamik ajornartoorfik sioqqutitsiarlugu Kalaallit Nunaannut nunanit allanit sulisartunik inuttassarsiornermut Fast-track’imik isumaqatigiissut, ilanngullugu peqqinnissaqarfimmut immikkoortillugu isumaqatigiissut pillugit Naalakkersuisut aamma Danmarkimi Udlændinge-og integrationsministereqarfiup (Nunat allamiunut akuulertitsinissamullu ministereqarfiup) akornanni isumaqatiginninniartoqarpoq.
Nunanit allanit sulisartunik inuttassarsiuisarneq suli naalagaaffimmi suliassaagaluartoq fast-track’imik isumaqatigiissutip qanoq isikkoqarnissaanik, qanorlu Kalaallit Nunaannut eqqunneqarnissaanik Naalakkersuisut nalunaarsinnaapput.
11. februaari 2021-mi atuutsinneqalersutut peqqinnissaqarfimmut inuttassarsiuinermut immikkoortitamik Fast-track’imik isumaqatigiissut nutaaq isumaqatiginninniarnerit taakku inernerisaata nassatarisimavaat.
Isumaqatigiissutikkut tassuuna peqqinnissaqarfimmi inunnut sulialinnut, atuuttuusumik piginnaatitaasunut immikkut ittumik aaqqiissut eqqunneqarpoq, takuuk Danmarkimi naalagaaffimmut atuuttutut peqqinnissaqarfimmi inunnut sulialinnut piginnaatitaaffiit, aamma peqqissutsimut tunngasutut suliaqarneq pillugit inatsit, taakku atorfeqartitaanerat isumaqatigiissummik ilaatinneqartillugu atorfigisamik iluani atorfinitsitaanissaq pillugu neqeroorummik pissarsisimassallutik, imaluunniit isumaqatigiissummik atsiugaqarsimassallutik.
Taamaalilluni isumaqatigiissummut ilaasutut atorfinitsitaanissamut isumaqatigiissutip annertuutut aningaasarsiaqarnermi atorfinitsitaanermilu atugassarisat pissutsit immikkut ittut malillugit pisuunissaannik piumasaqaammik malittarinninnerat matumuunakkut tunngaviliussaavoq.
Peqqinnissaqarfimmi inuit suliaqartut pineqartut taakku Namminersorlutik Oqartussani taakkununnga suliarisat tusarniaassutigeqqaarnagit piumasaqaataasut aamma piviusunngortissimatillugit najugaqarnissamut sulinissamullu akuersissummik nalunaaruteqarfiginissaat aaqqiissutip nassataraa.
Taamaattumik isumaqatigiissut taanna atorlugu Kalaallit Nunaanni peqqinnissaqarfimmut peqqinnissaqarfimmi inunnik suliaqartunik piaarnerusutut inuttassarsiortarnissaq Naalakkersuisut naatsorsuutigaat.
Pisariaqartitsinerit malillugit isumaqatigiissummik misilittakkanik Udlændinge-og integrationsministereqarfik aamma Naalakkersuisut oqaloqatigiittuartassapput, aammalu allannguutit tamakku pisariaqartuusinnaasut suliarisassallugit.
Suliffeqarfimmut tamatigoortutut fast-track’imik isumaqatigiissutip inaarsarnissaa pillugu Udlændinge-og integrationsministereqarfimmik isumaqatiginninniarnerit nangipput.

Inussiarnersumik inuulluaqqusillunga

Jess Svane
Suliffeqarnermut, Avatangiisinut Ilisimatusarnermullu Naalakkersuisoq