Alfred E. R. Jakobsen, 1958 - 2021

Nikalluutigeqisatsinnik nalunaarfigineqarpugut, Naalakkersuisunut ilaasortaasimasoq Alfred Jakobsen 12. februaari 2021-mi toqukkut qimaguttoq.

Alfred Jakobsen suliniarluartuusimavoq, kulturitsinnik pinngortitamillu najukkatsinnik pingaartitsisoq. Tamatigut tunniusimalluarluni pinngortitamik, immami pinngortitamik aamma nungusaataanngitsumik aalisarnermik illersuisuusarsimavoq. Eqqugassani ersiginagit Kalaallit Nunaanni pinngortitaq avatangiisillu pillugit oqallinnermut akuusarsimalluni. Aamma innuttaasuni ilisimasat aammalu pinngortitamik avatangiisinillu ilisimanninnerit nukittorsaaffiginiarlugit annertunerusumik siaruarteriniarluni siammasinnerusumillu oqallitsitsiniarluni kaammattuisarsimavoq.

Inuttut tunniusimaffii

Alfred Jakobsen nunaqarfimmi Arsummi ingerlalluartumi inunngorsimavoq. Alfredip isumalluartuunera nuannaartuuneralu ersarilluinnartuusimavoq, aammalu suminngaanneernera qularinngisaannarsimavarput.

Alfred Jakobsen Århusimi Niuernermut Højskolimi ilinniartuusimavoq, piffissamilu tassani kalaallit ilinniartut Danmarkimi illoqarfinni assigiinngitsuni pilersinniarneqarnerini sulilluartuusimavoq. Tamanna isumasioqatigiinnernik kinguneqartarpoq, naggataagullu 1980-ikkut aallartinneranni Danmarkimi Kalaallit Illinniartut Kattuffiat (DKIK), maanna ilinniartut peqatigiiffiannik AVALAK-mik taaguuteqartoq pilersinneqarpoq. Sulilluarnera peqqutaaqataalluni kalaallit ilinniartut atugarissaarnerulerput, tamatumalu kingunerisaanik kalaallit ilinniartut amerlanerusut ilinniakkaminnik naammassinnittalerput, aammalu Kalaallit Nunaata nutaanerusup Namminersornerullutik Oqartussat ataanni ineriartortitseqataallualerput – taakkununngalu Alfred Jakobsen akuuvoq. Iluarinartumik pissuseqarami nuannaartuullunilu Danmarkimi kalaallit ilinniartorpassuit inuunerinik oqinnerulersitseqataasinnaasimavoq, aammalu inuttut tunniusimanera politikkimik suliaqarnerani ilisarnaataasimavoq.

Alfred Kalaallit Nunaannut angerlareernermini ARSUK A.M.B.A.-p pilersinniarneqarnerani peqataalluarsimavoq, taannalu ajoraluartumik kingusinnerusukkut saarulliit Kalaallit Nunaata sineriaaniit tammakarmata matusariaqalersimavoq.

Politikkimik suliaqarnera
Nunami namminermi pinngortitami isumalluutitsinnik atuinerup illersuinerullu ataqatigiinnissaat Alfred Jakobsenimut pingaaruteqarsimavoq, tamannalu ilaatigut Peqqissutsimut, Avatangiisinut, Pinngortitamut Ilageeqarnermullu Naalakkersuisuugallarnerani (IA), tamatumalu kingorna Peqqissutsimut Avatangiisinullu Naalakkersuisuugallarneranit takuneqarsinnaasimavoq.

Tamatuma peqatigisaanik Alfred E. R. Jakobsen Kalaallit Nunaata nunani tamalaani oqallinnermi aammalu issuttumi suleqatigiinnermi ersarinnerulernissaanut sunniuteqaqataasimavoq. Alfred E. R. Jakobsen-imut Kalaallit Nunaata nunani tamalaani suleqatigiinnermi peqataanissaa, aammalu Kalaallit Nunaata nipaata tusaaneqarnissaa pingaaruteqarsimavoq. Tassalu 2001-imi CO2-mik aniatitsinerup annikillisinneqarnissaa pillugu Kyoto-mi isumaqatigiissutip akuerineqarnissaanut isumaqatigiissuteqarnissamut sinaakkusiussaq Alfred Jakobsenip, taamani Avatangiisinut Nukissiuuteqarnermullu Ministeriusoq Svend Auken peqatigalugu Naalakkersuisut sinnerlugit atsiorpaa. Aamma Alfred Jakobsen ukiorpassuarni unneqqarilluni suleqataareerluni, nunap inuiisa Issittup imartani qitiusumi nunani tamalaani aalisarnermut isumaqatigiissusiortarnermi, issittumi nunap inuiisa akuutinneqarnissaat qulakkeereqataaffigaa.

Alfred Jakobsenip tunniusimanera sulineralu tunngavissaqarluarput, tamannalu ilaatigut Namminersorlutik Oqartussat Pilersinneqarnissaannut Isumasioqatigiit Allattoqarfianni pisortatut, taamani Avatangiisinut Pinngortitamullu Pisortaqarfiusumi pisortatut, KNAPK-mi aamma ICC-mi arlaleriarluni pisortatut, kingullermillu Oceans North-imi pisortatut sulinerani takuneqarsinnaavoq.

Inuk ilisarisimasarput
Alfred Jakobsen inussiarnersuugami, ammasuugami isumagissaartuullunilu Avatangiisinut Pinngortitamullu Pisortaqarfimmi pisortaagallarami suleqatini illersugarisarpai, aammalu misilittagarpassuarminik ilisimasarpassuarminillu tuniorartarsimallugit. Sulisorpassuit Alfred E. R. Jakobsen ilitsersuisumittut, kulturerput, pinngortitaq avatangiisillu pillugit ilisimasaqalersitsisutut paasisimasaqalertitsisutullu oqaatigisarpaat. Alfred pisortaasimavoq suleqataasimallunilu naatsorsuutigineqarsinnaajuaannartoq, aammalu misilittagarpassuaqarami tunniusimalluarlunilu pisuni ataqatigiinni amerlasuuni suleqatitut tatigisaasimavoq. Amerlaqaluta maqaasisussaavarput, aammalu eqqaamaneqartuaannartussaavoq.

Alfred E. R. Jakobsen ilaqutai, ikinngutai suleqataalu qamannga pisumik misiginneqatigaagut.

Alfred E. R. Jakobsenip eqqaaneqarnera ataqqinartitaali.