Nunatta SDG-mi piujuartitsinermut suliai nalunaarsorneqarput

25. september 2015-imi, New Yorkimi FN-ip ataatsimeersuarnerani 2030 tungaanut piujuartitsilluni ineriartortitsinermut FN-ip nunarsuarmi anguniagai akuerai. 2030-mi anguniakkat siamasillutillu sukumiipput, nunarsuarmili innuttaasut kissaatigisaata suliamut pingaarnersiuinerannullu erseqqissumik ikorfartuillutik.

 

Sammisat amerlapput – naligiissitaaneq, meeqqat ilinniarnissamut pisussaaffeqarnerat, piujuartitsilluni ineriartortitsineq, assigiinngitsunik kultureqarneq kiisalu inuiaqatigiinni ataqatigiissuseq. Sammisat taakku Kalaallit Nunaannut aamma attuumassuteqarput.

 

Kalaallit Nunaat nunarsuaq tamakkerlugu suliami tassani imaqqortuumi ilaavoq, siullerpaamillu tamanna nalunaarusiami ataatsimi paasiuminartunngorlugu allanneqarluni.

 

”Inooriaaserput allanngoriartorpoq. Ingammi maani issittumi silap pissusiata allanngornerani kingunerit toqqaannaq misigivagut. Siku, taamani qimusserfigalugulu aalisartarfipput piffinni amerlasuuni tammarpoq. Piniartut inuutissarsiutigalugu piniartutut inooriaasertik qimattariaqarpaat umiatsiaararsortunngorlutillu”, Vittus Qujaukitsoq, Aningaasaqarnermut Naalakkersuisoq, suliamut aamma Kalaallit Nunaata ilaaneranut akisussaasoq nassuiaavoq, nangillunilu:

 

”Pissutsit taakku aalisarnermi pisuussutsinut kinguneqartitsisinnaapput, aammali ingerlatsinermut allanik piumasaqaatitalinnik ineriartortitsinissamut periarfissiisinnaallutik”.

 

Kalaallit Nunaata SDG-mi anguniagai erseqqissarnissaanut suliaq annertuvoq, piujuartitsisumillu ineriartortitsineq siuarsarneqassappat, kajumissutsimik suliallit, suliffeqarfiit aamma kommunit peqataanissaat pisariaqarluni.

 

Nalunaarusiaq kalaallisut qallunaatullu Aningaasaqarnermut Naalakkersuisoqarfiup nittartagaani uani “Nuna tamakkerlugu pilersaarusiortarnermut immikkoortortaqarfik” aaneqarsinnaavoq. Kingusinnerusukkullu tuluttut aamma saqqummersinneqarumaarluni.

 

 

            Vittus Qujaukitsoq, Aningaasaqarnermut Naalakkersuisoq

 

 

Attaveqatigiinneq:

Thomas Gaarde Madsen (Aningaasaqarnermut Naalakkersuisoqarfik)

Toqq/direkte 588159

TGMA@nanoq.gl