Ukiuunerani 2021-mi Nuussuup qeqertaasaani killilimmik tuttunniarsinnaaneq

Ukiuunerani 2021-mi Nuussuup qeqertaasaani killilimmik tuttunniarsinnaaneq Naalakkersuisut akuersissutigaat, KNAPK-p qinnuteqartitsinera tunngavigalugu.

 

Naalakkersuisut tuttutassiissutit 88-it akuersissutigaat, taakkuuppullu aqutsiveqarfinniit pineqartuniit siorna pisarineqartut pillugit paasissutissat tunngavigalugit aasaanerani aamma ukiaanerani 2020-mi pisarinngitsuukkatut APNN-miit qulakkeerneqarsinnaasimasut. Taamaammat tuttutassiissutiniit aalajangerneqareersuniit pisarinngitsuukkanik nuussineq pineqarpoq taamatullu piujuaannartitsumik tuttunniarsinnaaneq.

 

Ukiuunerani tuttunniarsinnaaneq biologiniit nalinginnaasumik inassutigineqanngilaq pissutigalugu tuttut ukiuunerani aniguinissamut eqqissisimatinneqarnissartik pisariaqartikkaat. Biologit siunnersuisarnerat malillugu ukiuunerani tuttunniarsinnaaneq aqutsinermi atugassaavoq aatsaat tuttut aqutsiveqarfinni amerlavallaalersimatillugit.

 

Naalakkersuisut aalajangiineranni kulavaat ilumioqartut eqqarsaatigineqarput, taamaattumillu angutivissat kisiisa piniaqqusaapput. Tuttunut akornusiinerup minnerpaaffimmiitinneqarnissaa aammattaaq eqqarsaatigineqarpoq piniarneqarsinnaanerallu taamaallaat 12. februaarimiit 25. februaari ilanngullugu ingerlassaaq tassalu ullut 14-iinnaat.   

 

 

Sukumiinerusumik paasisaqarusukkaanni immikkoortortaqarfimmi pisortaq Amalie Jessen attavigiuk, oqarasuaat 34 53 04, e-mail: amalie@nanoq.gl