Issittumi piginnaasanik annertusaaneq

Issittumi piginnaasanik annertusaanissaq pillugu Naalakkersuisut danskit naalakkersuisuinik oqaloqatigiinnikuupput. Piginnaasanik annertusaanermi siunertaavoq Issittumi Atlantikullu Avannaani nakkutilliineq nukittorsarneqarnissaa, tamanna pissaaq sumiiffimmi najuunnerunikkut suliassanillu ingerlatsinermi kalaallit piginnaasaannik ilisimatusarfiinilu peqataatitsinikkut.

Naalakkersuisut oqaloqatiginnipput Kalaallit Nunaannut aningaasaliissutit innuttaasunut annertunerpaamik iluaqutaatikkumallugit. Naalakkersuisut politiikeraat issittoq sakkulersorfiunnginnissaa attatiinnarneqassasoq, taamaattumillu tamanna tunngavigalugu Kalaallit Nunaanni piginnaasaat atorluarneqarnissaat oqaluuserineqarluni.
- ” Ilulissani isumaqatigiissut aallaavigalugu sakkussianik annertusaaneq pinaveersaartinneqassaaq. Nakkutilliinerunissamut nukittorsaaneq sakkussianik annertusaanerunngilaq, akerlianillu nunap killeqarfianik nakkutilliinerunissamut pisinnaatitaaffigalugu, tamannalu piginnaasanik annertusaanissami ersarissarneqarpoq” Naalakkersuisut Siulittaasuat Kim Kielsen oqarpoq, nangillunilu

- ”Issittumi piginnaasanik annertusaanermi itinerusumik ilusilersuinermi danskit naalakkersuisuinik oqaloqateqarnitta ingerlateqqinnissaa Naalakkersuisunit qilanaarivarput. Ilaatigut suliffeqarfiutitta piginnaaneqarfittalu, tassani soorlu Air Greenland Asiarlu suliassanik kivitseqataasinnaanissaat naatsorsuuteqarfigaarput.” Naalakkersuisut Siulittaasuat oqarpoq.
Issittumi piginnaasanik annertusaanermi suliaq suli suliarineqarpoq, kalaallillu soqutigisaat nukittorsarniarlugit danskit naalakkersuisui Naalakkersuisullu akornanni oqaloqatigiinnerit illugiillunilu soqutigisat pillugit pitsaasumik suleqatigiittoqarluni.

Attavissat: Naalakkersuisut Siulittaasuata allattaa Steve Sandgreen stev@nanoq.gl & Naalakkersuisut Siulittaasuata allattaa Angutinnguaq Tittusen angu@nanoq.gl