Qaqugukkut qanorlu Inatsisartunut qinersisoqarnissaanik nalunaaruteqartoqartarpa?



Naalakkersuisut Siulittaasuata Naalakkersuisoqarfia arlaleriarluni apeqquteqartoqarsimanera tunngavigalugu qaqugukkut qanorlu Inatsisartunut qinersisitsisoqartarneranik erseqqissaasaaq.

Pisut pingasut tunngavigalugit Inatsisartunut qinersisoqarnissaanik nalunaaruteqartoqartarpoq:

1: Naalakkersuisut Siulittaasuat ukiut sisamat qinigaaffiusup qaangiutilernerani Inatsisartunut nalinginnaasumik qinersisoqarnissaanik nalunaaruteqartarpoq. Maannakkut piffissaq qinigaaffiusoq 24. apriili 2022-mi qaangiutissaaq.

2: Ukiut sisamat qinigaaffiusoq qaangiutsinnagu Naalakkersuisunit Inatsisartunilluunniit Inatsisartunut qinersinissaq kissaatigineqarpat, inatsisissatut siunnersuummik immikkut ittumik Inatsisartunut qinersisitsinissamik siunnersuussiortoqarsinnaavoq.

3: Inatsisartut Naalakkersuisunut tatiginnikkunnaarpata, Inatsisartut Naalakkersuisunut tatiginnikkunnaarnermik nalunaaruteqarsinnaapput. Tatiginnikkunnaarneq Inatsisartuni akuerineqarpat, Naalakkersuisut Siulittaasuat immikkut ittumik qinersisoqarnissaanik ingerlaannartumik nalunaaruteqarsinnaavoq.

---

Insartsisartunut qinersinissamut aalajangersakkat pillugit paasisaqarnerorusukkuit Inatsisartut inatsisaanni nr. 26, 18. november 2010-meersumi §§ 26-28-mi allassimasut www.inatsisit.gl –imi atuarsinnaavatit.