Cigaritsit kimmivikui pinngortitamiit piissapput



Cigaritsit kimmivikui eqqaavinnut arsakoorfinnullu iginneqartussaapput. Misissuinerup nutaap takutippaa kimmivikut pinngortitamut iginneqannginnissaat annertuumik isumaqatigiissutaasoq.


Kimmivikutit igiinnartarpigit?
Pujortartartut 60%-ii cigaritsit kimmivikuinik nunamut pinngortitamullu eqqaaginnartanngillat. Misissuinermi, HS Analyse-p Ilisimatusarnermut Avatangiisinullu Naalakkersuisoqarfik sinnerlugu ingerlataani taamatut akissuteqarput. Kisiannili pujortartartut 15%-iisa nassuerutigaat, ullut tamaasa cigaritsit kimmivikuinik tamaangaannaq igitsisarlutik.

Misissuinermi tassani takutinneqarpoq, inersimasut quliugaangata qulingiluat cigaritsit kimmivikuisa nunaannarmut pinngortitamullu qimaannarneqartarnerat ajornartorsiutitut isigisaraat. Ajornartorsiut aaqqinniarlugu iliuuseqartoqarnissaa ataatsimut annertuumik tapersersorneqarpoq.

- Cigaritsit kimmivikuisa pinngortitamiittussaannginnerat annertuumik isumaqatigineqarmat isumalluarnarpoq. Kimmivikut tamaangaannaq iginneqartartut pillugit suliniuteqartoqarnissaanut tapersersuisoqarnera Naalakkersuisunit nuannaarutigineqarpoq, Suliffeqarnermut, Ilisimatusarnermut Avatangiisinullu Naalakkersuisoq Jess Svane oqarpoq.

Eqqagassani peqqissutsimilu unammilligassat

Cigaritsit kimmivikui tamaangaannaq igitat pinngortitamut ajoqusiisarput. Plastikkinik sanaajupput aammalu akuutissanik avatangiisinut ajoqusiisartunik aniatitsisarlutik. Kimmivikut akuttunngitsumik uumasunit nerisassaanasorineqartarput aammalu illoqarfimmi isigiuminaallititsisarput.

Innuttaasut affaat sinnerlugit pujortartarput, aammalu pujortartarnerup peqqissutsimut unammillersitsisarnera peqqutigalugu atungaanerata annikillisarneqarnissaa Naalakkersuisut siunnerfigereerpaat. Kisiannili suliniutit, kimmivikut igitassatut unammillertitsinerinik siunnerfeqartut pisariaqartinneqarput.

Eqqaaviit amerlanerusut, qujanaq
Eqqaaviit arsakoorfiillu amerlanerusut pisariaqartinneqarput. Pujortartartut kimmivikunik tamaangannaq igitsisartut tamangajammik misissuinermi akissuteqarput, eqaaviit arsakoorfiillu naammanngimmata, imaluunniit taamaaliornissaq ajornannginnerummat taamaaliortarlutik.

Taamaattumik illoqarfinni nunaqarfinnilu eqqaavinnik arsakoorfinnillu amerlanerusunik ikussuinissaq aaqqiissutissatut tulluunneruvoq. Kimmivikunik isumatusaartumik igitsinissaq ajornannginnerussaaq. Tamanna Naalakkersuisut kommunillu sulissutigaat.

Taakku saniatigut qaqqamiikkaanni, imaatigut angalagaanni assigisaanilluunniit iliuuseqaraanni arsakoorfiit kaasarfimmiortakkat atorneqarsinnaapput. Taamaattumik Naalakkersuisut kommunillu akuttunngitsumik arsakoorfinnik kaasarfimmiortakkanik akeqanngitsumik agguaasarput. Aamma qillertuusamik mikisumik imaluunniit puussiamik, kimmivikuusivittut atorneqartumik kaasarfimmioqartoqarsinnaavoq.

Pilersitsinerit nutaat aallartingajalerput
Paasititsiniaanissami tulliuttumi cigaritsit kimmivikuisa eqqaavimmut iginneqartarnissaat Naalakkersuisunit siunnerfigineqarniarpoq. Paasititsiniaaneq ateqarpoq “Pinngortitarput qajassuutsigut kimmivikunut”

Aamma Ilisimatusarnermut Avatangiisinullu Naalakkersuisoqarfik kimmivikut pillugit nassuiaat tamanut ammasumik tusarniaassutigineqarpoq. Nassuiaat qanoq iliorluni kimmivikut ajornartorsiutaanerisa killilersorneqarsinnaanerinut nassuiaateqarfiuvoq.. Tusarniaaneq 9. marsi 2021-p tungaanut killeqarpoq, nassuiaallu Naalakkersuisut tusarniaanermi isaaffiani uani takuneqarsinnaavoq: https://naalakkersuisut.gl/da/H%c3%b8ringer/Arkiv-over-h%c3%b8ringer/2021/2601_Cigaretskod

Annertunerusumik paasisaqarusunnermi Ilisimatusarnermut Avatangiisinullu Naalakkersuisoqarfimmi pisortaaneq Mette Skarregaard Pedersen oqarasuaat: 346476/529844-mut, imaluunniit e-mail: mesp@nanoq.gl imaluunniit pan@nanoq.gl aqqutigalugit attaveqarfigineqarsinnaavoq.