Nuummi najugaqartutut nalunaarsorsimasut 65-ileereersimasut tamarmik ulluni makkunani akiuusutissanik kapitinnisamut neqeroorfigineqarput

1. marts 1956 sioqqullugu inunngorsimaguit, aammalu inuit allattorsimaffianni Nuummi najugaqartutut nalunaarsorsimaguit, imaluunniit januaarimi siullermeerlutit akiuussutissamik kapitissimaguit, ulluni makkunani coronamut akiuussutissamik kapitinnissamut periarfissaqarputit.
Innuttaasut 65-inik sinnerlugillu ukiullit, inuit allattorsimaffianni Kalaallit Nunaanni najugaqartutut nalunaarorsimasut tamarmik marlunngornermi 9. februaarimiit sisamanngornermi 11. februaarimut coronamut akiuussutissamik kapitinnissamut neqeroorfigineqarput. Akiuussutissanik kapuineq USK-ip eqaarsaartarfiani ingerlanneqassaaq.

Februaarimi marsimilu akiuussutissanik kapuinissaq
Kalaallit Nunaanni sap. ak. 13 ilanngullugu akiuusutissat Pfizer/BioNTech-imeersut poortat katillugit arfineq pingasut tiguneqarnissaat naatsorsuutigineqarpoq. Tamannali suli Peqqissutsimut Aqutsisoqarfimmmiit inaarutaasumik uppernarsarneqanngilaq. Pilersaarutit malillugit akiuusutissat taakku illoqarfinni tikerarfiunerpaasuni innuttaasunut 65-ileereersimasunut, Kalaallit Nunaanni najugaqartutut nalunaarsorsimasunut atorneqassapput. Illoqarfimmi aalajangersimasumi akiuussutissanik kapuinissap pinissaanut sapaatit akunnerata siuliani sumut qaqugulu akiuussutissamik kapitinnissaq pillugu saaffiginnittoqassanersoq nalunaarutigineqassaaq – peqqissutsimut oqartussaasunut imaluunniit Corona pillugu Allattoqarfimmut saaffiginnittoqassanngilaq.

Poortat sisamaat, Nuuk & Qeqertarsuatsiaat (kapuutit 1.300-t missaanniittut
Akiuussutissanit, Kalaallit Nunaanni tiguneqartunit poortat sisamaat Nuummi innuttaasunik, 65-inik sinnerlugillu ukiulinnik kapuinermut, Nuummi peqqinnissaqarfimmi paaqqutarinniffinnilu sulisunik, siornatigut kapitissimasunik kapueqqinnermut, aammalu Qeqertarsuatsiaani innuttaasunik 16-it sinnerlugillu ukiulinnik kapuinermut atorneqassapput.

Kapuinerit taakku pilersaarutit malillugit sapaatit akunneranni tullermi aallartinneqassapput, aammalu Issittumi Sakkutooqarfik suleqatigalugu pilersaarusiornissamut sungiusarnermut atatillugu ingerlanneqassallutik, sungiusarnermilu tassani misilittakkat siunissami sumiiffinni § 12-imut ilaasuni (illoqarfinni, nunaqarfinni aammalu ukioq kaajallallugu najugaqarfinni tikerarfiunngitsuni) akiuussutissanik kapuinissamut pilersaarusiornerit ingerlaqqinnissaannut atorneqassapput.

Qeqertarsuatsiaani 16-it sinnerlugillu ukiulinnik kapuinerit marlunngornermi unnukkut ingerlanneqassapput. Paamiuni 65-inik sinnerlugillu ukiulinnik, utoqqaat angerlarsimaffiini ukiui apeqqutaatinnagit najugalinnik, peqqinnissaqarfimmi aammalu utoqqaat angerlarsimaffiini sulisunik kapuinerit pingasunngornermi ualikkut ingerlanneqassapput.