Ilisimatusarfimmi Ilinniagartuutut gradi qaffasinnerpaaq tiguneqarsinnaalerpoq

Nalunaarutip nutaap Ilisimatusarfimmi doktoritut gradinik tunniussisinnaanngornissaa periarfissaalersippaa. Gradit qaffasinnerpaat taakku tunniunneqarsinnaapput doktorinngorniutip tunniunneqartup nalilerneqareerneratigut doktorinngorniutillu oqaluttariarsorluni illersorneqareerneratigut. Doktoritut gradi ukiuni arlalinni ilisimatusarluni sulinermik tunngaveqarajuppoq takutinneqartarlunilu ilisimatusarnermik paasisimasaqarneq ilisimatuutullu inerisimaneq.

Ilinniartitaanermut, Kultureqarnermut Ilageeqarnermullu Naalakkersuisoq, Katti Frederiksen oqarpoq: ”Ilisimatusarfik 1983-ip aallartinneraniilli piginnaaneqarluarluni ineriartupallassimaqaaq. Nunat assigiinngitsut akornanni qaffasissuseq naapertorlugu Ilisimatusarfimmi doktor gradimik maannakkut tunniussisalernissarput taamaattumik pissusissamisoorpoq”.

Ilisimatusarfimmi rektori, Gitte Adler Reimer oqarpoq: “Maannakkut doktor gradimik Ilisimatusarfiup tunniussisinnaanngornera nuannaarutaavoq – taamaalilluni nunatsinni ukiuni arlalinni pitsaasumik ilisimatusarneq uagutsinnit nersorniarneqarsinnaanngorpoq”.

Annertunerusumik paasisaqarusukkuit attavigiuk: Carl Egede Bøggild, Immikkut siunnersorti, Ilinniartitaanermut, Kultureqarnermut Ilageeqarnermullu Naalakkersuisoqarfik uani cegb@nanoq.gl