Naalakkersuisoq Jess Svane Qaarsuni Niaqornanilu innuttaasunik ataatsimiititsivoq

Qaarsuni, Niaqornani Uummannamilu tassaarsuartoqarsinnaanissaaneranut paasissutissat nutaat Avannaata Kommuniani kommunalbestyrelsimut aamma Qaarsuni Niaqornanilu innuttaasunut saqqummiunneqarput.

Suliffeqarnermut, Ilisimatusarnermut Avatangiisinullu Naalakkersuisoq Jess Svane ulluni kingullerni Ilulissaniippoq, Uummannamiippoq, Qaarsuniippoq Niaqornaniillunilu, Qaarsuni, Niaqornani Uummannamilu tassaarsuartoqarsinnaaneranut ulorianartorsiornermi paasissutissat nutaat saqqummiukkiartorlugit. Qaarsuni Niaqornanilu ataatsimiititsinernut Avannaata Kommuniani borgmesterip tullia siulleq aamma upalungaarsimanermut pisortaq peqataapput.

 

”Kommuni suleqatigalugu Qaarsuni Niaqornanilu innuttaasut pissarsiviulluartumik ataatsimeeqatigaagut. Innuttaasut pissutsit pillugit oqaluttuunneri, aamma eqqarsaataat annilaangassutillu pillugit tusarnaarnerini isaasigut isiginissaat uagutsinnut pingaaruteqarsimavoq. Karrat Kangerluanni qaqqamit sisoortoqarsinnaanera pillugu ilisimasanik nutaanik saqqummiussinerput annilaangalersitsisimammat paasinartorujussuuvoq, kisiannili qaqqamit ataatsikkut sisoortoqarnissaa ilimanavinngitsoq erseqqissaatigissallugu uannut pingaaruteqarsimavoq.”

 

”Mianersornissaq tunngavigalugu Avannaata Kommunia pigaartoqarnermik aallartitsivoq, tassanilu najukkani upalungaarsimasut imaq nakkutigeqqissaartussaavaat, aammalu tassaarsuaqalissappat nilliasaatit aallartittussaallugit. Neriuppunga ataatsimiititsinitsinni Qaarsuni Niaqornanilu toqqissisimanerulersinneqarsimassasut”, Suliffeqarnermut, Ilisimatusarnermut Avatangiisinullu Naalakkersuisoq Jess Svane oqarpoq.

 

 

 

 

 

Ataatsimiititsinernut tunngaviuisoq

2021-mi januaarip naanerani Ilisimatusarnermut Avatangiisinullu Naalakkersuisoqarfik tusagassiorfinnut nalunaarummik, tassaarsuaqalernissaanut najoqqutassiamut nutaamut, Karrat Kangerluani sumiiffiup sisooriaannaap ataatsikkut immamut nakkarnerani susoqarnissaanik takutitsiviusumut tunngasumik nassiussivoq. Misissuinermi takutinneqarpoq, taamatut sisoortoqassappat tassaarsuaqalersinnaasoq, Qaarsuni, Niaqornani Uummannamilu mallinik 5 meterinik qarsutititsisunik. Misissuinermi inerniliissutigineqarpoq, qaqqamit sisoortussat ataatsikkut sisoorsinnaanissaat ilimanavinngitsoq, aammalu misissuinerit maannamut inerneri nalorninartortaqartut. Ilisimatusarnermut Avatangiisinullu Naalakkersuisoqarfimmiit GEUS-ip aammalu immikkut ilisimasallit Norgemiut naatsorsugaat sukumiinerusut utaqqineqarput. Naatsorsukkat marsip qaammataata ingerlanerani piareernissaat naatsorsuutigineqarpoq.

 

Maannamut paasissutissaagallartut – naak nalorninartoqaraluartut – Qaarsuni aamma Niaqornani innuttaasunut ingerlateqqinneqarnerinut mianersornissaq tunngavigineqarpoq.

 

Attaveqarfissaq

Annertunerusumik paasisaqarusunnermi Ilisimatusarnermut Avatangiisinullu Naalakkersuisoqarfimmi pisortaaneq Mette Skarregaard Pedersen tlf.: 346476-imut imaluunniit pan@nanoq.gl aqqutigalugu attaveqarfigineqassaaq.

 

Paasissutissanut tunngaviusut:

Asiaq-p ilisimatitsissutai, 4. januaari 2021-mi aamma  21. januaari 2021.

Illorsuarni, Niaqornani, Qaarsuni aamma Uummannami qarsutsisinnaanermut nunap assingi aaneqarsinnaapput.

 

Paasissutissat:

 

Karrat 3 qaqqamiippoq, qaqqamit 2017-mi sisoortumit quleriaammik anginerusoq aammalu tassaarsualersitsisoq. Karrat 3-p ukiorpassuit ingerlanerini nikikkiartornera takussutissaqarpoq.

 

Mallit portussusii Asiaq-p tassaarsuarnut immikkut ilisimasalik Patrick Lynett suleqatigalugu GEUS-imit paasisat kingulliit tunngavigalugit tassaarsuaqarnissaanut najoqqutassiamik mallillu qarsutsinissaannut nunap assinganik suliaqarpoq. Najoqqutassiami takutinneqarpoq, ajornerpaamik pisoqassappat (worst case) tassaarsuaq uku missaannik portussuseqassasoq:

 

-          Nuugaatsiami 28,4 meterit,

-          Illorsuarni 8,7 meterit,

-          Niaqornani 3,8 meterit,

-          Qaarsuni 4,8 meterit, aamma

-          Uummannami 4 meterit.

 

Qarsutsinissamut nunap assinga tassaavoq nunap assinga, sumiiffimmi nunap sananeqaataa tunngavigalugu tassaarsuartoqassappat qarsutsinissat portussusiinik takutitsiviusoq.

 

Tassaarsuarnut najoqqutassiaq tassaarsuup sumiiffinnut qanoq eqquisinnaaneranut takutitsiviuvoq.