Qaleralinniarnermi aqutsiveqarfiup 47-ip kujammut killeqarfianik kujavartitsineq

Aasianni aamma Qasigiannguani nunaqarfinnilu Akunnaami, Ikamiuni aamma Kitsissuarsunni umiatsiaararsortut, umiatsiaaqqamik aqutsiveqarfimmi 46-mi 2020-mi aalisarsinnaanermut akuersissuteqartut qaleralinniarnermi aqutsiveqarfiup 47-ip kujammut killeqarfianik kujavartitsinerup kingunerisaanik akuersissuteqarnerinik allannguuteqartitsiffigineqassapput. Aalisartut pineqartut sumiiffiimmi 47-mi aalisarsinnaanermut 2021-mut qinnuteqartut akuersissummik tunineqarsinnaalissapput.

Sinerissap qanittuani qaleralinniarneq pillugu Namminersorlutik Oqartussat nalunaarutaat allanngortinneqarmat, januaarillu aallaqqaataani 2021-mi atuutilermat,  Qeqertarsuup Tunuani aqutsiveqarfiup kujammut killinga kujasinnerulaartumut 68°51’N-mut 68°30’N-mut killeqalerpoq.

Qaleralinniat illoqarfinni nunaqarfinnilu taaneqartuneersut aalisarfik pineqartoq aalisarfigereerpaat, taamaammallu aqutsiveqarfiup kujammut killeqarfianik allannguuteqartitsisoqarnerani ajornerulersitsisumik eqqugaassaanngitsut Aalisarnermut, Piniarnermut, Nunalerinermullu Naalakkersuisup Jens Immanuelsenip isumaqarfigivaa, erseqqissaatigaluguluaalisartut Qeqertarsuup Tunuata qaleraliinik aatsaat aalisalertuunngitsut. Aalisartut sumiiffimmi aatsaat aalisalertuunngimmata, pisassiissutigineqartunik aalisarsimanngitsutut oqaatigineqarsinnaanatik, aalisarfigisaalli allamik killeqalermat  allannguuteqartitsinerusoq.

Aasianni Qasigiannguanilu nunaqarfinnilu Akunnaami, Ikamiuni Kitsissuarsunnilu umiartsiaararsorlutik aalisartunut aqutsiveqarfik 46-mi aalisarsinnaanermut akuersissutit 24-t maannamut tunniunneqareersimapput. Sumiiffimmi 47-mi aalisarsinnaanermut akuersissutinik qinnuteqaatit pingasut maannamut tiguneqarput.

2020-mi aalisarsinnaanermut akuersissutillit 40-t tamarmik sumiiffimmi 47-mi umiatsiaararsorluni aalisarsinnaanermik 2021-mut akuersissuteqarnissamut maannakkut neqeroorfigineqassapput.

Akuersissut umiatsiaaqqanut taamaallaat atuuppoq, sumiiffimmi aalisariutit anginerusut qaleralinniutigineqassappata, taakku pisassiissutinit peqarnissaat pisariaqarmat.

Qeqertarsuup Tunuani kujammut killigisimasaa aalisariutinut anginerusunut pisassiissutinit pigisalinnut 2012-mi atuutilersinneqarmat 68°00’N-mut inissinneqarpoq sumiiffiillu pisassiiviunngitsut ukiakkut 2014-mi atuutilersinneqarmat 68°52,5’N-mut nuunneqarpoq, taamaalilluni Qeqertarsuup Tunuata kujasinnerusortaa pisassiiviunngitsumik aalisarfiuvoq sumiiffittulli allatut taaneqarlutik ”sumiiffiit pisassiiviunngitsut”.

 

Attavigineqarsinnaavoq Aalisarnermut, Piniarnermut Nunalerinermullu Naalakkersuisoqarfimmi immikkoortortami pisortaq, Emanuel Rosing. E-mail: emro@nanaoq.gl