Peqqinnissaqarfik angerlarsimaffeqanngitsunut neqeroorummik immikkut ittumik aallartitsivoq

Angerlarsimaffeqanngitsut peqqissusaat pitsanngorsarniarlugu Nuummi peqqinnissaqarfik, Unnuisarfik Kialaarfimmi peqqissutsimut neqeroorutinik aallartitsivoq.

Februar 2020-mi angerlarsimaffeqanngitsut inuuniarnikkullu ajornartorsiortut pillugit isummersoqatigiinnermik ingerlatsinermut atatillugu, Nuummi eqqaanilu innuttaasunut angerlarsimaffeqanngitsunut sapaatip akunneranut ataasiarluni piffissamik nakorsiartitsisarnermik pilersitsisoqarpoq.

Peqqissutsimut Naalakkersuisoq Anna Wangenheim oqarpoq:

”Peqqinnissaqarfimmi neqeroorut, Kofoeds Skole suleqatigalugu pilersinneqartoq, tigulluarneqarpoq, taamaattumik nuannaarutigaara peqqinnissaqarfiup neqeroorut annertusisimammagu, Unnuisarfik Kialaarfimmut aamma atuutilersillugu”

Nangillunilu:

”Angerlarsimaffeqarani inuuneq aarlerinartorpassuarnik imaqarpoq, nalunngilarput inunnut ataasiakkaanut timikkut, tarnikkut inuuniarnermilu peqqissutsimut sunniuteqartartoq. Angerlarsimaffeqanngitsut immikkut pisariaqartitaannik naammassinninnissamut neqeroorummik pilersitsinikkut, peqqissutsimik siuarsaanissamut atatillugu eqquilluarnerusoqarsinnaavoq. Sumiiffiit taakku marluk pulaarnissai pilersaarutigaara, suliniutillu malittarinissaanut qilanaarlunga”.

Neqeroorut februar 2021-p qeqqata missaani aallartinneqassasoq naatsorsuutigineqarpoq.


Annertunerusumik paasisaqarniarlutit naalakkersuisup allattaa Frederik Siegstad attavigiuk e-mail-imut: frsg@nanoq.gl