Corona matusigaluartoq Galtrup Efterskolemi inuuneq ingerlaannarpoq

Danmarkimi efterskolernerup ulluinnarni sungiusimasamik ingerlanneqarnera coronamut killilersuutit peqqutaallutik unitsinneqarallarpoq. Galtrup Efterskolemili unitsinneqanngilaq. Naak Galtrup Efterskolemi sammisassat assigiinngitsut, soorlu atuarfik qimallugu sammisaqartitsinerit arlaqartut killilersimaarneqaraluartut, efterskolep ingerlanneqarnera nalinginnaasumik ulluinnarni sungiusimasamik iluatsittumik pilersaarusiorneqarluni ingerlanneqarpoq.

Ilinniartitaanermut, Kultureqarnermut Ilageeqarnermullu Naalakkersuisup, Katti Frederiksenip atuarnerat najugaqarnerallu pillugit atuartut attaveqaatikkut pingasunngornermi februaarip ulluisa pingajuanni ataatsimeeqatigai. Kalaallit atuartut 15-it missaaniittut Galtrup Efterskolemi atuarnertik ulluinnarnilu inuunertik pillugu Naalakkersuisumut oqaluttuaraat.

Danmarkimi matusisoqaraluartoq inini atuartitsivinni atuartinneqartarlutillu inooqataanertik pisarnertut ingerlappaat. Ulluinnarni atuartitsinerup saniatigut atuartut pissanganartunik assigiinngitsunik sammisassaqartinneqartarput. Danmarkimilu Covid-19-i ilungersuatitsigaluartoq atuartut atugarissaarnerat nuannaarnerallu Naalakkersuisumit maluginiarneqarpoq.

”AFS-erlunga USA-mukartussaagaluarlunga, covid-19-ili peqqutaalluni efterskolernissara aalajangiuppara. Tamanna tassaavoq aalajangikkanni pitsaanerpaaq”, atuartoq ataaseq oqaluttuarpoq. Atuartup ikinngutiginerpaasani efterskoleqatigileramiuk aamma nuannaarutigaa.

Efterskoleforeningip, Galtrup Efterskolep Namminersorlutillu Oqartussat suleqatigiinnerisigut kalaallit atuartut allani efterskoleniittut Galtrup Efterskolemi najugaqarnissaannut atuartinneqarnissaannullu periarfissippaat.

Atuartitsineq inooqataanerlu ingerlaannaqqullugit atuartut sulisullu covid-19-imut minnerpaamik sapaatip akunneranut ataasiarlutik misissortittarput, aamma covid-19-imut ersiuteqarnerlutik maluginiartarpaat, tassani nunami innuttaasut allat assigalugit malittarisassat malissallugit pingaartillugu.

Ilinniartitaanermut, Kultureqarnermut Ilageeqarnermullu Naalakkersuisup, Katti Frederiksenip Galtrup Efterskole Efterskoleforeningilu Covid-19-ip nalaani iliuusaannut tamanut annertuumik qujaffigai. Kalaallit Illuutaat peqatigalugit annertuumik nalissaqanngitsumillu Danmarkimi efterskoleni atuartunut kalaallinut suliniuteqarput.

”Toqqissinarpoq paasillugu inuusuttatta ilinniarumasatik piviusunngortissinnaagaat Danmarkimullu ilinniariartorsinnaasimasut naak pisoq nalaanneqartoq immikkut ikkaluartoq. Tamanna efterskoleni atuartunut, lærlinginut aamma ilinniarfinni allani ilinniartunut atuuppoq. Nalunngilarput suleqatigisatta pisariaqartitsineq naapertorlugu isumannaatsumik sulisut. Pingaartumik ukiumut tullermut ilinniagaqarniarluni qinnuteqarfissap killinga qanilliartortillugu tamanna paasillugu toqqissinarpoq, oqarpoq Naalakkersuisoq, Katti Frederiksen.

Nunatsinni, Danmarkimi nunanilu allani ilinniarnissamut qinnuteqarnissaq pisarnertut marsip aallaqqaataa sioqqullugu periarfissaavoq. Ilitsersorneqarnissaq qinnutigiuk illit imaluunniit angajoqqaat nalornigussiuk ilinniagaq sorleq toqqassanerit, qanoq qinnuteqassanersutit imaluunniit assersuutigalugu Covid-19 ilinniakkamut kissaatigisannut qanoq sunniuteqarnersoq – pingaartumik Danmarkimi ilinniarfimmi ilitsersuineq nalinginnaasoq attavigisinnaanngikkukku.

Kalaallit Illuutaat suleqatigineqartoq ilitsersuisarpoq, nunatsinnilu najugaqaruit ilinniarfinnut imaluunniit najukkanni Majoriamut saaffiginnissinnaavutit. Sumiluunniit najugaqaraluaruit nalorniguit qarasaasiakkut ilitsersorneqarnissaq aamma periarfissaavoq - https://aqqut.gl/evejledning/

Annertunerusumik paasisaqarusukkuit Naalakkersuisup allattaa, Nukaaka Tobiassen, mail-imut nuto@nanoq.gl –mut attavigiuk.