Immap assingi elektroniskiusut amerlanerusut Kalaallit Nunaannut tikingajalerput

Ineqarnermut Attaveqaqatigiinnermullu Naalakkersuisoqarfiup Geostyrelsen suleqatigalugu Kalaallit Nunaata kitaata kujataanut immap assingi elektroniskiusut naammassineqarnissaat aalluppaa.

Matuma kinguliani Geodatastyrelsen-ip tusagassiorfinnut nalunaarutaa ingerlateqqinneqarpoq:

”Geodatastyrelsen-ip Kalaallit Nunaata kitaata kujataani immap assingisa elektroniskiusut suliarineqarneri sukkatsisippaa.

Geodatastyrelsen 2018/2019-imi iluatsilluartumik misileraareerluni, 2021-imi immap assinginik elektroniskiusunik immikkut ittunik, ENC-nut nalinginnaasunut aammalu immap assinginut pappiaqqanut saqqummersinneqaqqammersunut nutaanut, GPS-ikkut sumiissusersiornermut naleqqussakkanut assingusunik, kisiannili paasissutissanik ikinnerusunik imalinnik saqqummersitsisarluni aallartissaaq. ENC-t Geodatastyrelsen-ip iluani Basis ENC-nik taagorneqarput, aammalu Kalaallit Nunaanni imaatigut angallannerup isumannaatsuunissaanut pitsanngueqataassallutik.

- Immami uuttortaanernit paasissutissanik nutaanerusunik amerlasuunik peqarpugut, aammalu Basis ENC-nik suliaqarnitsinni paasissutissanik taakkuninnga ullumikkornit sukkanerujussuarmik saqqummersitsinissamut, iluaqutaaffissaannullu; tassalu atuisartunut apuussisarnissamut periarfissaqalissaagut. Imartani uuttortaaffigineqarsimasuni isumannaannerusumik angalasoqarsinnaalissaaq, taamaalillunilu imarsiortut isumannaannerusumik sumiissusersiorsinnaalissapput, Elisabeth Hagemann, Geodatastyrelsen-imi allaffimmi pisortaq nassuiaavoq.

Basis ENC ENC-tut nalinginnaasutut, umiarsuit sumiissusersiutaanni elektroniskiusuni atorneqarsinnaasutut saqqummersinneqassaaq, taamatullu Geodatastyrelsen-ip niuernikkut suleqataannit, immap assinginik elektroniskiusunik aliikkutaralugu angalasartunut aalisartunullu il.il. pilersuisuusunit pissarsiarineqarsinnaalissallutik.

- Basis ENC-p atulernissaa pissanganarluinnarpoq. Geodatastyrelsen umiartortunut paasissutissanik nutartikkanik naatsorsuutigisamit sukkanerusumik Kalaallit Nunaanni atuisunut nassiussisinnaalernissaa nuannaarutigisorujussuuarput, Kenneth Lund Bøjler, Kalaallit Nunaanni Ineqarnermut Attaveqaqatigiinnermullu Naalakkersuisoqarfimmi immikkoortortamut pisortaq ilassusiivoq.

Immap assinginut pappiaqqanut taartaassanngillat
Atuisut eqqumaffigissavaat, Basis ENC taamaallaat paasissutissanik pisariaqarnerpaaginnarnik imaqarmat, taakkununngalu itissutsimut paasissutissat, sinerissap titarnerinut innersuussutit aammalu paasissutissat, sumiissusersiornermut pingaarutillit, soorlu naaralaartitsiviit, napparutit naleqqat kabelillu pillugit paasissutissat ilaatinenqarput. Taamaattumik sumiiffini, immami uuttortakkanik nutaanerusunik katersuiviusimanngitsuni angalassagaanni, immap assingi pappiaqqat pisariaqartinneqarsinnaapput.

ENC-p iluaqutissartaasa ilagaat, kikkunnilluunniit pissarsiarineqarsinnaagami, taamaallaalli søkortplotter-imik tablet-imilluunniit atuisuunissaq, aammalu Geostyrelsen-ip niuernikkut suleqataanut, immap assinginik elektroniskiusunik siaruarterisartunut atuisutut nalunaarsorneqarsimanissaq pisariaqartinneqarmat.

- Immap assingisa elektroniskiusut atuisunut assigiinngitsunut arlalinnut, soorlu umiatsiaarasortunut aliikkutaralugulu angalasartunut, nalinginnaasumik angalanerminni immap assinginik atuineq ajortunut apuunneqarnissaat naatsorsuutigaarput. Immap assingisa nutaat saniatigut pissarsiassartaraat, immap assingini nutaani itissutsit assigiinngissutaasa immikkoortorpassui takuneqarsinnaammata, tamannalu assersuutigalugu aalisartut immikkut soqutigisarisinnaavaat, Elizabeth Hagemann oqaluttuarpoq – kisiannili immap assinginik nutaanik atuinermi aalisakkanik amerlanerusunik pisaqartoqarnissaa qulakkeersinnaannginnerarpaa!

- Namminersorlutik Oqartussat aamma Geodatastyrelsen-ip akornanni isumaqatigiissut 2017-imi iluarsineqarpoq, aammalu 2018-imi suliaqarnissamut pilersaarut nutaaq suliarineqarpoq, tassani 2026-imi naammassinninnissaq naatsorsuutigineqarluni. Tassalu immap assingisa isumaqatigiissutaasut naammassinissaat qilanaarisorujussuuarput, kisiannili aamma tamatuma pinnginnerani suliniutinik, imaani isumannaallisaanermut aalisarnermullu iluaqutaasorujussuusussanik ingerlatsisoqarnissaa nuannaarutigaarput, Kenneth Lund Bøjler naggasiivoq.

Geodatastyrelsen-imit naatsorsuutigineqarpoq, Basis ENS-p atulernerani 2023 naaginnartoq Kalaallit Nunaata kitaata kujataani sumiiffinni, Geodatastyrelsen-ip itissutsinut uuttortakkanik nutaanik peqarfigisaani tamani immap assinginik elektroniskiusunik nutaalianik ataqatigiissunillu atuisoqarsinnaalissasoq.”

Paasissutissat:
Basis ENC-mi siunertaq:
- Paasissutissanik pitsaasunik atorsinnaasunik annertussusilikkanik atugassiineq
- Immami uuttortaanerni paasissutissat atuisunut saqqummiunneqarsinnaalernissaat sioqqullugu piffissamik atorneqartumik sivikillititsineq
- Sumiiffinnik nutaanik aamma aqqutaasinnaasunik nutaanik ammaanissaq siunertaralugu Kalaallit Nunaanni ENC-p atuuffiinik pitsannguineq
Basis ENC naammassineqarpat, tamatuma kingorna Geostyrelsen-ip paasissutissanik sinneruttunik ingerlaavartumik immiinissaq, kiisalu sumiiffinnut immap assinginik assingusunik suliaqarnissaq isumagissavaa. Basis ENC-p suliaqarnissamut pilersaarut pioreersoq, Geostyrelsen-ip Namminersorlutik Oqartussat suleqatigalugit suliarisimasaa taarsissanngilaa kinguartissanaguluunniit (https://gst.dk/soekort/groenlandske-farvande/soekortproduktion-for-groenland/)

Basis ENC taamaallaat paasissutissanik pisariaqarnerpaanik, sumiissusersiornermut atorneqartussanik imaqassaaq:
- Multibeam atorlugu itissutsinut paasissutissat,
- Sineriammut innersuussutit nutaat
- Paasissutissat, sumiissusersiornermut pingaarutillit, soorlu naaralaartitsiviit, napparutit naleqqat kabelillu
-
Basis ENC sunik IMAQASSANNGILA:
- Immami uuttortaanernit paasissutissat ”nutaanngitsut” (multibeam atorlugu uuttortagaanngitsunut paasissutissat)
- Nunamiit paasissutissat, soorlu tatsit, nunap ilusii atillu il.il.


Attaveqarfissat:
Elizabeth Hagemann, Allaffimmi pisortaq, Geodatastyrelsen, Email: ehage@gst.dk
Kenneth Lund Bøjler, Immikkoortortaqarfimmi pisortaq, Ineqarnermut Attaveqaqatigiinnermullu Naalakkersuisoqarfik, Email: kebo@nanoq.gl