Inuit pisinnaatitaaffii pillugit isumalioqatigiissitamik nutaamik pilersitsinissaq unitsikkallarneqarpoq

Peqqissutsimut Naalakkersuisoqarfiup decemberimili Kalaallit Nunaanni inuit pisinnaatitaaffii pillugit isumalioqatigiissitat pillugit Inatsisartut inatsisissaanut nutaamut siunnersuut tusarniaassutigaa. Siunnersuut 2021-mi ukiakkut ataatsimiinnermi saqqummiunneqassasoq pilersaarutaagaluarpoq, 1. juli 2022-mi atulersinneqassasoq siunertaralugu.

Siunnersuut annertuumik soqutigineqarsimavoq, piffissamilu tusarniaaffiusumi tusarniaanermi akissutit 20-t sinnerlugit tiguneqarput.

Peqqissutsimut Naalakkersuisoq, Anna Wangenheim ima paasissutissiivoq:
”Tusarniaanermi akissuterpassuit atuarpakka, taakkunani suleqatigisartakkatta arlallit kissaatigaat siunnersuutip imarisaanut sunniuteqarsinnaanerunissartik, matuma ataani inuit pisinnaatitaaffii pillugit isumalioqatigiissitap ilusilersorneqarneranut sulineranullu. Tamanna soorunami tusarnaarusuppara.

Tusarniaanermi akissutit tiguneqartut tunngavigalugit aalajangerpunga, siunnersuut unitsikkallarneqassasoq, ilassutissat pitsaasorpassuit tiguneqartut aallaavigalugit siunnersuutip tulluarsareersimanissaata tungaanut.
Tamatuma saniatigut illuatungerisat attuumassuteqartut tamarmik siunnersuutip tulluarsarneqarneranut peqataanissamut neqeroorfigineqassapput, taamaasillunga qulakkeersinnaassagakku, siunnersuut inuit pisinnaatitaaffii pillugit suliassaqarfimmut iluaqutaasunik tamanik sunniuteqarfiussasoq kiisalu politikkikkut siammasissumik tapersersorneqassasoq.

Siunnersuummut oqaaseqaateqarnissamut piffissamik atuisimasut tamaasa qutsavigaakka, erseqqissassavaralu, siunnersuutip piffissami kingusinnerusumi suliarineqarnera nanginneqarpat sulinermi ilanngunneqassasut.”


Attavigiuk
Annertunerusumik paasisaqarniarlutit naalakkersuisup allattaa Frederik Siegstad attavigiuk e-mail-imut: frsg@nanoq.gl