Takornariartitsinermut inuussutissarsiortunut sammititanik ikiorsiissutit

Covid-19-p tunillaassuunnera suli takornariartitsinermik inuussutissarsiortunut sakkortuumik eqqueqqavoq. Taamaammat Naalakkersuisut inuussutissarsiortunut ikiorsiissutit siunnerfilikkat pingasut, inuussutissarsiortut piffissamik ajornakusoornartumik qaangiinissaannut ikiorsiisussat aallartippaat.

 

Ikiorsiissutit makkunannga imaqarput: Ikiuigasuaatit (aalajangersimasumik aningaasartuutinut matussutissanut ikiorsiissutit, iluanaarutissatut annaasat kiisalu ajornartorsiornermi taarsigassarsisinnaanermut periarfissaq), suliffeqarnermi ikiorsiissutit (sulisunik soraarsitsinernut taarsiullugu aningaasarsianut taarsiissutit) kiisalu sulianik ingerlatsinermut ikiorsiissutit (unnuinernut misigisassarsiorlunilu angalatitsinernut akikilliliissutinut tapiissutit).

 

Inuussutissarsiortut ilaatinneqartut tassaapput takornariartitsinermik inuussutissarsiornermut atassuteqartut. Taakku tassaapput angalatitseqatigiiffiit, angallassisartut, unnuisarfiit, neriniartarfiit kiisalu suliffeqarfiit misigisassarsiornermik ingerlatsisut.

 

”Takornariartitsinermik inuussutissarsiortut nunarsuarmi covid-19-p tunillaassuuneranut atatillugu matusinernit sakkortuumik eqqorneqarput. Taamaammat piffissami ajornakusoornartumi takornariartitsinermik inuussutissarsiortut ikiornissaat Naalakkersuisut kissaatigaat. Inuussutissarsiortut nappaatip tunillaassuunnerata qaangiunnerani siuariartoqqilernissaannut ikiorneqarnissaat siunertaavoq”, Inuussutissarsiornermut Aatsitassanullu Naalakkersuisoq Jens-Frederik Nielsen nassuiaavoq, ilanngullugulu aatsitassarsiornermik inuussutissarsiortunut sullissisunut ikiorsiinissamik pisariaqartitsineq misissorlugu aallartinneqartoq paasissutissiissutigaa. 

 

Aningaasaqarnermut Naalakkersuisoq Vittus Qujaukitsoq, ima ilassusiivoq:

 

”Maanna pissutsit immikkorluinnaq inissisimanerat immikkorluinnaq ittunik aaqqissusiornissamik pisariaqartitsivoq, ikiorsiissutillu pissutsit inissisimanerinut iliuusaapput. Ikiorsiissutit ataavartumik aaqqiissutaannginnerat Naalakkersuisut erseqqissaatigissavaat, taakkumi pissutsit ajornerpaat qaangiunnissaasa tungaannaannut aaqqissugaagallartuupput”.

 

Ikiorsiissutit 2021-mi januaarimit juunip tungaanut matussutaassapput. Kalaallit Nunaannut tikinnermi ulluni tallimani mattusimasarnermik atulersitsineq kingusinnersukkut Naalakkersuisut atorunnaarsippassuk, ikiorsiissutit atuisunut (takornarianut) akikilliliissutaat ullut 30-t qaangiunneranni atorunnaassapput, taamaattoq kingusinnerpaamik ulloq 30. juni 2021.

Siuliani taaneqartuni ikiorsiissutinut aningaasartuutit 45 mio. kr-inik annertussuseqarnissaat Naalakkersuisut ilimagaat, taakkulu ikiorsiissutinut 35 mio. kr-nik, ingerlatsinermut ikiorsiissutinut 3 mio. kr-t sinneruttullu 7 mio. kr-t suliffeqarnermi ikiorsiissutini aningaasartuutinut matussutissatut. Siorna upernaakkut ikiorsiissutit aallaavigalugit aningaasartuutit naatsorsorneqarput.

 

Akileraartarnermut Aqutsisoqarfik suliffeqarnermut ikiorsiissutinut aqutsisuuvoq (aningaasarsianut taartit). Paasissutissat erseqqinnerusut ilitsersuutillu sullissivik.gl aaneqarsinnaapput.

 

Innovation Greelandip ikiorsiissutit sinneruttut marluk, ikiorsiigasuaatit ingerlatsinermullu ikiorsiissutit aqussavai. Paasissutissat erseqqinnerusut ilitsersuutillu innovation.gl aaneqarsinnaapput.

 

Naalakkersuisut qinnuteqaataat Inatsisartut Aningaasaqarnermut Akileraartarnermullu Ataatsimiititaliaannit akuerineqarpoq.

 

 

     Jens-Frederik Nielsen, Inuussutissarsiornermut Aatsitassanullu Naalakkersuisoq 

 

     Vittus Qujaukitsoq, Aningaasaqarnermut Naalakkersuisoq

 

 

 

Tusagassiortunut attaveqartoq:

 

Martin Christiansen, Attaveqarnermi sulisoq (Aningaasaqarnermut Naalakkersuisoqarfik)

Toqq/direkte 345213

MCHR@nanoq.gl