Kangerlussuup eqqaani Piniarfik 2, 3 aamma 4 ukiuunerani umimmanniarnermi piumasaqaatit nalinginnaasunngorput

Kangerlussuup eqqaani Piniarfik 2, 3 aamma 4 ukiuunerani umimmanniarnermi piumasaqaatit 27. januar 2021-miit utaqqiisaagallartumik allanngortinneqartut februaarip aallaqqaataaniit atuuttumik kingumut nalinginnaasunngorput. Piniarnermut Nakkutilliisut piniartut suleqatigalugit Kangerlussuup sikua misissoreerlugu nalunaarput siku isumannarunnaartoq, Piniarfik 3-mi aamma 4-mi ukiuunerani umimmanniarneq taamaalilluni februaarip aallaqqaataaniit atuuttumik nalinginnaasumik ingerlanneqarsinnaalerpoq tassungalu akuersissutillit taamaallaat Piniarfik 3-mi aamma 4-mi piniarsinnaalerlutik.

Piniarfik 5-mi ukiuunerani umimmanniarnissamut akuersissutillit februaarip aallaqqaataaniit atuuttumik aammattaaq Piniarfik 3-mi aamma 4-mi umimmanniarnissamut innersuunneqarput pissutigalugu Kangerlussuarmiit Piniarfik 5-ip tungaanut Isortup Kuuatigut ingerlaarnissamut aqqut suli aputeqarpiannginnera pillugu ingerlaarnissaq ajornarsimammat. Piniarfik 5-ip tungaanut ingerlaarnissamut pissutsit allannguuteqassappata allamik nalunaaruteqassaagut.

Ilanngullugu aamma nalunaarutigineqassaaq Piniarfik 1-imi motoorilinnik ingerlaarneq Qeqqata Kommuniata ileqqoreqqusaa malillugu inerteqqutaammat soorluttaaq tammajuitsussanik tiggannik aamma kulavannik norralinnik umimmanniarneq akuersissutini allaqqasut malillugit piniarfinni tamani inerteqqutaasoq.

Sukumiinerusumik paasisaqarusukkaanni immikkoortortaqarfimmi pisortaq Amalie Jessen attavigiuk, oqarasuaat 34 53 04, e-mail: amalie@nanoq.gl

Ilanngussaq