Meeqqat peqqinnissaat qitiutillugu Maniitsumut paasisassarsioriartorluni tikeraarneq

Peqqissutsimut Naalakkersuisoq ulluni januaarip 25-ianni 26-iannilu 2021-mi Maniitsumut paasisassarsioriartorluni tikeraarpoq.

Illoqarfimmi alakkaasaqattaarnermut siunertaasoq tassaavoq, innuttaasut nalinginnaasumik peqqissusaannik paasisaqarnissaq, kiisalu susassaqaqatigiit akornanni suleqatigiiffiusinnaasut pillugit paasisaqarnerunissaq, ingammik meeqqat peqqinnissaat qitiutitsineq. Tamatuma saniatigut aamma Inuit tarnimikkut nappaatillit imaluunniit tarnimikkut nappaateqartutut pasineqartut suliniuteqarfigineqarnerat pitsanngorsarniarlugu nunamut tamarmut atuuttussamik iliuusissatut pilersaarusiortoqarnissaa siunertaralugu, tarnikkut napparsimasunik sullissineq pillugu paasissutissanik katersinissaq paasisaqarnissarlu ukkatarineqarput.

Paasisassarsioriartornermi peqqissaavik, kigutileriffik, atuarfik Kilaaseeraq, Ulloq Unnuarlu Paaqqinniffik Elisibannguaq, meeqqeriviit Paarsi aammalu Angajo, kiisalu atugarissaarnermut immikkoortortaqarfik alakkarneqarput.

Peqqissutsimut Naalakkersuisoq, Anna Wangenheim, ima oqarpoq:
“Pingaarnertut illoqarfimmi suliffeqarfiit aammalu illoqarfik ataatsimut isigalugu pitsaasumik paasisaqarpunga. Suliniuteqarluartartut pimoorussillutik, nutaaliorlutik piujuartitsillutillu suliaqartartut naapippakka. Coronap nalaaniinnerput illoqarfimmut inituvoq. Tamatuma malitsigisaanik pisut ilaanni suleqatigiissutissanik nutaanik pitsaanerusunillu kinguneqartitsivoq. Paarlattuanik peqqinnissaqarfiup kommuniullu akunnerminni suleqatigiinnertik iluaqutaasumik qanoq pitsanngorsarsinnaanerugaat takuara. Tamanna oqaloqatiginnikkut annertunerusumik pisinnaavoq, tamannalu kaammattuutigissavara.”

Tikeraarnermi illoqarfiup inuuttaasuisa akornanni tarnikkut, timikkut eqqarsartaatsikkullu peqqissuunissaq aallaavigalugu, Anna Wangenheimip innuttaasut illoqarfimmi oqaloqatiiutigaluni pisuttuaqatigiinnissamut soqutiginnittut qaaqqunikuuai.

Paasisaqarnerorusukkuit Naalakkersuisup allattaa Frederik Siegstad e-mail: frsg@nanoq.gl imaluunniit oqa. +299 554160 aqqutigalugit attavigiuk.