Niaqornani, Qaarsuni Uummannamilu tassaarsuaqarsinnaaneranut paasissutissat nutaat

Karrat Kangerluanni sumiiffik sisoorsinnaasoq ulorianarnerpaaq ataatsikkut immamut nakkassappat susoqarnissaa tassaarsuaqarsinnaaneranut najoqqutassiami nutaami takutinneqarpoq. Tassaarsuarmik, mallinik Niaqornani, Qaarsuni Uummannamilu 5 meterit tikillugit portussusilinnik pilersitsiviusumik aallartitsisinnaavoq. 2021-mi upernaap ingerlanerani naatsorsukkat sukumiinerusut naammassineqarnissaat naatsorsuutigineqarpoq.

Karrat Kangerluanni qaqqaq ulorianartorsiortitsinerpaaq qaqqamit, 2017-imi tassaarsuarmik pilersitsisumik, Nuugaatsiamik Illorsuarnillu eqquisumik sisoorfiusumit quleriaatip missaanik annertuneruvoq. Qaqqap ataatsikkut sisoortoqarnissaa ilimanavinngilaq, kisiannili aamma ajoraluartumik taamaattoqassanngitsoq oqaatigineqavissinnaanani.

”Paasissutissat nutaat ilungersunartutut tigusariaqarpagut. Innuttaasut sumiiffimmiittut paasitinnissaat paarinissaallu pisussaaffigaarput. Innuttaasut sumiiffimmiittut illersorniarlugit Naalakkersuisut aamma Avannaata Kommunia pigaartuusarnermik, najukkani upalungaarsimasut immamik nakkutiginnilluarfigisassaanik pilersitsipput. Tassaarsuaqalissagaluarpat najukkani upalungaarsimasut nilliasaatinik aallartitsissapput, aammalu innuttaasut erngerlutik imaq ungasillillugu qaffasinnerusumut qimaassapput”, Naalakkersuisoq Jess Svane oqarpoq.

Oqartussaasuniit innuttaasunut sumiiffimmiittunut eqqaasitsissutigineqassaaq, imaq tassanngaannaq tinerujussuarpat imaluunniit nalinginnaasumit ulinneruppat erngerlutik imaq ungasillillugu qummut qimaassasut.

Misissuinerit amerlanerusut pisariaqarput
Asiaq-p tassaarsuarnut immikkut ilisimasalik Patrick J. Lynett suleqatigalugu GEUS-imit paasisat kingulliit tunngavigalugit tassaarsuaqarnissaanut najoqqutassiamik mallillu qarsutsinissaannut nunap assinganik suliaqarpoq. Najoqqutassiami takutinneqarpoq, ajornerpaamik pisoqassappat tassaarsuaq uku missaannik portussuseqassasoq:
  • Nuugaatsiami 28,4 meterit,
  • Illorsuarni 8,7 meterit,
  • Niaqornani 3,8 meterit,
  • Qaarsuni 4,8 meterit, aamma
  • Uummannami 4 meterit.
Misissuinerit inerneri maannarpiaq nalorninarput. GEUS-ip Norge-mi immikkut ilisimasallit suleqatigalugit naatsorsuinerit misissuinerillu sukumiisut ingerlappaat. Misissuinerit inernerisa taakku 2021-mi marsip qaammataata ingerlanerani piareernissaat naatsorsuutigineqarpoq.

Paasissutissatigut tunngaviusut nalornissutigineqaraluartut paasissutissaagallartut maanna saqqummiunneqarnerinut mianersornissamik tunngaveqarneq peqqutaatinneqarpoq. Innuttaasut tassaarsuaqarnissaanut takussutissanut immikkut ittumik eqqumaffiginninnissamut eqqaaseqqinneqarnissaat pingaaruteqarpoq.

Imaq ataannartumik sikoqarpat, tamanna tassaarsuaqarnissaanut annikillisaataasinnaavoq, kisiannili maannarpiaq tamanna pillugu ilisimasanik uppernarsaasiinissaq amigaatigineqarpoq.

Upalungaarsimanermut Ataatsimiititaliap inassuteqaatai
Upalungaarsimanermut Ataatsimiititaliami paasissutissat nutaat oqallisigineqarput, aammalu Qaarsunut, Niaqornanut Uummannamullu tunngatillugu inassuteqaatinik arlalinnik, Naalakkersuisut malissallugit aalajangiiffigisaannik saqqummiussilluni.

Upalungaarsimanermut Ataatsimiititaliap inassutigaa:
- Paasissutissat nutaat tamanut ammasumik saqqummiunneqassasut.
- Sumiiffinni pineqartuni nilliasaatit ajunnginnersut misissorneqassasoq.
- Avannaata Kommuniata upalungaarsimanermut pilersaarutimini tassaarsuaqarsinnaanerata eqqarsaatigineqarnissaa qulakkiissagaa.
- Tassaarsuarmik takkuttoqarsinnaaneranut takussutissat nalinginnaasut (immap tinerujussuarnera) pillugit innuttaasut eqqaasinneqassasut.
- Mianersornissamik tunngaveqarluni tassaarsuaqarnissaanut najoqqutassiat sukumiinerusut 2021-mi marsimi pissarsiarineqarnissaasa tungaanut pigaartuusarallartussanik pilersitsinissaq eqqarsaatigineqassasoq.
Upalungaarsimanermut Ataatsimiititaliaq naliliivoq, maannarpiaq Uummannami pigaartoqartarnermik taamaattumik pilersitsinissaq pisariaqanngitsoq.

Paasissutissiiviusumik ataatsimiititsinerit
Qaarsuni, Niaqornani Uummannamilu innuttaasunut paasissutissiiviusumik ataatsimiititsinernik ingerlatsisoqassaaq. Paasissutissiiviusumik ataatsimiititsinissanut piffissaliussassat kingusinnerusukkut Avannaata Kommunianit allagarsiissutigineqassapput.

Annertunerusumik paasisaqarusunnermi Ilisimatusarnermut Avatangiisinullu Naalakkersuisoqarfimmi pisortaq Mette Skarregaard Pedersen tlf.: 346476-imut imaluunniit pan@nanoq.gl aqqutigalugu attaveqarfigineqassaaq.

Paasissutissanut tunngaviusut:
Asiaq-p allagai, 4. januaari 2021 aamma 21. januaari 2021-mi ullulerneqartut uunga aaneqarsinnaapput.

Illorsuarni, Niaqornani, Qaarsuni Uummannamilu qarsutsisinnaanermut nunap assingi uunga aaneqarsinnaapput.

Paasissutissat:
Karrat 3 qaqqaqarfiuvoq, qaqqaqarfimmit 2017-imi sisoorfiusumit, aammalu tassaarsuarmik pilersitsiviusumit quleriaammik annertunerusoq. Karrat 3 ukiorpassuarni nikerarfiusoq takussutissaqarpoq.

Mallit portussusii Asiaq-p tassaarsuarnut immikkut ilisimasalik Patrick J. Lynett suleqatigalugu GEUS-imit paasisat kingulliit tunngavigalugit tassaarsuaqarnissaanut najoqqutassiamik mallillu qarsutsinissaannut nunap assinganik suliaqarpoq. Najoqqutassiami takutinneqarpoq, ajornerpaamik pisoqassappat (worst case scenario) tassaarsuaq uku missaannik portussuseqassasoq:
- Nuugaatsiami 28,4 meterit,
- Illorsuarni 8,7 meterit,
- Niaqornani 3,8 meterit,
- Qaarsuni 4,8 meterit, aamma
- Uummannami 4 meterit.
Qarsutsinissamut nunap assinga tassaavoq nunap assinga, sumiiffiup sananeqaataa tunngavigalugu mallit qarsutsinermi portussuserisinnaassaanik takutitsiviusoq.

Tassaarsuaqarsinnaaneranut najoqqutassiaq tassaarsuup sumiiffinnik eqquinerani pissuserisinnaasaanik takutitsiviuvoq.