Tusarniaanerit Kuannersuarnut atatillugu kinguartinneqassanngillat

Qaartartumeerinissanik sakkulersornernillu imaqartunik, nunatta kujataani Kuannersuarnut suliniummut atatillugu tusarniaanernut atatillugu Naalakkersuisunut sammisunik, siorasaarutinik annguttoqarsimavoq.

Tamatuma kingunerisaanik Inuussutissarsiutinut Aatsitassanullu Naalakkersuisup nalunaarutiginiarpaa, siullermeerutaasumik tusarniaatitsinerni peqataannginnissani. Siorasaarinerit pimoorussaarpasinngillat. Piffissamili kingullermi inuiaqatigiinni paasissutissat eqqunngitsut kissatsissimaarnerillu politikimi peqataanernut atatillugu ima aalassatsisimatigipput, tamakku allaat inuiaqatigiinni toqqissisimajunnaartitsillutik.

Tusarniaanernut atatillugu ataatsimiititsinissat inatsisit aallaavigalugit suliaqarnermut ilaapput, taamaaliornermilu Narsap eqqaani aatsitassarsiorfiulersinnaasumut atatillugu ammasumik tamallu oqartussaaqataanerannik pilersitsisussaammata.

Inuussutissarsiornermut Aatsitassanullu Naalakkersuisoq pisumut ima oqarpoq:

”Nunap iluanut nunanullu allanut tikkuussissutigissallugu ajorpoq, politikkikkut sunniiniarnerit nakkuusernertigut toqutsinissamillu siorasaarinerit aqqutigalugit. Tamanna tv-iikkuinnaq takusaraluagarput, maanna Kalaallit Nunaanni atugaalerpoq. Piviusoq tamanna isiginiartariaqarpara imatut kinguneqartikkallarlugu, soorlu siullermeerutaasumik tusarniaatitsinerni nunatta kujataaniittuni peqataananga.

Greenland Mineralsip oqartussaniillu inuit attuumassutillit peqaataaffigisaanik, ataatsimiinnerit pilersaarutaasutut ingerlanneqassapput, taamaalilluni teknikkitigut qaffasissuseqartumik suliniummut tunngasumik oqaloqatigiittoqalissammat. Taamaaliornermi una naliliineq aallaaviuvoq, navianartoqarsinnaanera inunnut politikkikkut suliaqartunut tunngammat, ingerlatseqatigiiffinni oqartussanilu suliaqartunut attuumanngimmat. Tamatuma saniatigut, isumannaatsumik peqqissaartumillu pisoqarniassammat, piffinni isumannaallisaanermut atatillugu naammattunik aaqqiisoqassaaq.

Isumannaallisaanermut pisoq ataaseq nalilerpara, tamatumali saniatigut isummagut, aalajangiinigut, inuiaqatigiinnilu periutsigut siorasaarinerit aaqqissussanngilaat. Suliaq tusarniaanernut tunngasoq ingerlassaaq. Tamanna tamat oqatussaaqataanerisa inatsisinit illersugaasup ingerlanerivaa, kikkulluunniit suliamut isummersortissinnaatillugit. Ingerlaneq taamaattoq naqisimaneqanngisaannassaaq. Tusarniaanernut atatillugu ataatsimiinnerni amerlanerpaat paasissutissiiffigineqassapput, piiaaffiliorniarluni kissaateqarnermut atatillugu pissutsinut ataasiakkaanut tunngasunik. Tusarniaanernut atatillugu ataatsimiititsinerit Naalakkersuisut akuersaarnissaannut akuersaannginnissaannulluunnit aalajangiiffiunngillat.”


Naalakkersuisut navianaateqartoq nalilersortuarniarpaat, politikerillu akisussaaqataasut peqataaffigisaanni kingusinnerusukkut tusarniaanernut atatillugu ataatsimiinnerni peqataaffigisaallutik.

Attavigisassat:

Naalakkersuisup allattaa, Salik Damgaard, oqaras.: +299 346894

Pisortaaneq Naalakkersuisoqarfimmi, Jørgen T. Hammeken-Holm, oqaras.: +299 346846