Kangerlussuarmi Piniarfik 3, 4 aamma 5-imi umimmanniarnissami piumasaqaatit allanngorput

27. januar 2021-miit makkua piumasaqaatinut allannguutit atuutilerput allamik nalunaaruteqarnissap tungaanut:
  1. Inuit Kangerlussuarmi Piniarfik 3 aamma 4-mi umimmanniarnissamut akuersissutillit tamarmik sikukkoornissaat imaluunniit assartuutinik motoorilinnik ingerlanissaat inerteqqutaavoq kangerluup sikua saappaallaarmat ulorianarlunilu. Allannguuteqarpat umimmanniartunut nalunaarutigineqassaaq siku angallannissamut navianarunnaartutut nalilerneqarpat. Allannguut inuussutissarsiutigalugu sunngiffimmilu piniarsinnaanermut allagartalinnut atuuppoq.
  2. Inuussutissarsiutigalugu aammalu sunngiffimmi piniartut Piniarfik 3 aamma 4-mi umimmanniarnissamut akuersissutilinnut Piniarfik 2 ammarneqarpoq sikup isumannarunnaarniissaata tungaanut.
  3. Piniarfik 5-imi umimmanniarnissamut akuersissutillit Piniarfik 2-mut innersuunneqarput aputip atorsaalernissaata tungaanut, aammalu sioqqat apummiittut angallannermut ajoqutaajunnaarnissaata tungaanut
  4. Piniarfik 3, 4 aamma 5-imut akuersissutilinnut umimmanniarnissamut akuersissutit atunngitsuugaasimasinnaasut, maannalu Piniarfik 2-mut innersuunneqartut, piffinni taaneqartuni atorsinnaavaat, kangerluup sikuata inissisimanera navianarunnaarpat aammalu aput angallannissamut ajorunnaarpat.
  5. Pisassiissutit amerlassusaat aamma akuersissutit tunniussat Piniarfik 1-5-imi allannguuteqanngillat, kiisalu piniarfiit annertussusaat tamakkiisumik allannguuteqaratik, takuuk nunap assinga ilanngussaq 4-mi.
  6. Qeqqata Kommuneata angallannissamut aalajangersagaliai malinneqassapput, Aasivissuarmi aamma Nipisat-ni UNESCO-mi nuna pineqartumi.
Allannguutit suliarineqarnikuupput Naalakkersuisoqarfiup, Qeqqata Kommuneata, nakkutilliisut aamma piniartut akornanni isumasioqatigiinnikkut suleqatigiilluarnikkullu. Sikup aputillu inissisimanera malunnaatilimmik umimmanniarnerup ingerlalluarnissaanut unamminarpoq. Kangerlussuarmi neqileriffimmut umimmaat neqaannik tunioraasoqarpoq.





Sukumiinerusumik paasisaqarusukkaanni immikkoortortaqarfimmi pisortaq Amalie Jessen attavigiuk, oqarasuaat 34 53 04, e-mail: amalie@nanoq.gl