Aalisarsinnaanermut allaffissornikkut aqutsinermik misissuineq

Tusagassiuutinut nalunaarut una Jørgen Schultz-Nielsenip Sermitsiaq.ag-mi januaarip 22-iani ilanngutassiaanut akissutaavoq.

Aallaqqaasiullugu oqaatigineqassaaq, Kukkunersiuinermut Ataatsimiititaliap oqaaseqaataa Naalakkersuisoqarfimmut nassiunneqarnikuunngitsoq. Naalakkersuisoqarfiup taanna tusagassiuutitigut paasivaa. Naalakkersuisoqarfiulli aqutsinermik misissuinermut atatillugu Kukkunersiuinermut Ataatsimiititaliaq suliamut atatillugu allaqatigilluartarnikuuaa.

Aalisarnermut, Piniarnermut Nunalerinermullu Naalakkersuisoqarfiup Kukkunersiuinermut Ataatsimiititaliap aqutsinermik 2020-mi misissuinera pisassiissutinik aalisarsinnaanermullu akuersissutinik aqutsiveqarfimmi suliarineqartarneranni naleqqutinngitsoqariataarsinnaaneranut misissuinissamut periarfissaalluartutut qujarunnikuuaa.

Naalakkersuisoqarfik Deloittep aqutsinermik misissuinermit nalunaarusiaa aalisanermi pisassiissutinik aalisarsinnaanermullu akuersissutinik aqutsinerup pitsanngorsarnissaanut inassuteqaatit atuutilersinniarlugit maannakkut misissorpaa.

Aalisarnermut naalakkersuisoqarfimmi suliassanik suliarinnittarnitsinni pikatattorujussuarmik suleriaaseqanngilagut.

Sermitsiaq.ag-mi ilanngutassiami naalakkersuisoqarfiup aalisarnermut inatsimmut tassanilu piginnaatitsenrrit naapertorlugit nalunaarutini aalajangersakkat arlallit atuutitinnikuunngikkai allaaserineqarpoq.

Pineqartoq tassaavoq aalisarnermi ingerlatseqatigiiffitta ilisimaneqartut piginnittuunermik uppernarsaatinik piumasaqaateqarfigineqarnikuunngitsut, tassa ingerlatseqatigiiffinnik ukiut tamaasa suliaqartaratta taakkulu uagut ilisimasaraagut. Angallatit angissusaannut uppernarsaatinut nunamilu sumi nalunaarsorneqarnerannut uppernarsaatinut tunngatillugu tamakku pinerit tamaasa piumasarisarnikuunngilagut, tassa angallatit amerlanersaat nalunnginnatsigit angallatillu pillugit paasissutissat tamarmik aalisarsinnaanermut akuersissutinik nalunaarsuivitsinneereermata.
Tamanna oktobarimi 2020-mili iluarsineqarnikuuvoq. Piginnittuunermik uppernarsaatit, nunami sumi nalunaarsorneqarsimanerannut uppernarsaatit angallatillu angissusaannut uppernarsaatit suliaqannginnermi qinnuteqaammut qinnuteqaatini ataasiakkaani ilanngunneqartarnissat piumaasaqaataavoq, ukiup siulianut sanilliullugu piginnittut allanngorsimannerat, ingerlatseqatigiiffiup taannaaginnarnera angallatillu allanngorsimannginnera apeqqutaatinnagu.

Tamassuma saniatigut aqutsinermik misissuinermit nalunaarusiami allaaserineqarpoq sinerissap qanittuani qinnuteqarsinnaanermut killissarititaq atuutitinneqanngitsoq. Qinnuteqarnissamut killissarititaq taanna atuutitinneqarnikuunngilaq, tassa aalisartut sinerissap qanittuani ukioq tamaat aalisarsinnaanissaasa qulakkeerneqarnissaa politikikkut kissaatigineqarmat. Nalunaarut pineqartoq tamassuma kingorna nutarterneqarnikuuvoq qinnuteqarnissamullu killissarititamik imaqarunnaarnikuulluni.

Tassa inatsimmi immikkoortut ilaannik atuutititsisoqannginnera uparuarneqaraangat pissutsit qulaani taaneqartut aqutsinermik misissuinermit nalunaarusiami uparuarneqartarput.

Aqutsermi suleriaaseq inissippoq
Allaaserisami aalisarsinnaanermut akuersissutinik tunniussisarnermut itigartitsisarnermullunniit tunngavilersuisoqartannginnera pillugu aqutsinermi suleriaaseqartoqannginneragaasoqarneranut tunngatillugu Naalakkersuisoqarfiup ilisimatitsissutigisinnaavaa Aalisarnermut akuersissutit pisassiissutillu pillugit Namminersorlutik Oqartussat nalunaarutaat nr. 47, 18. december 2020-meersoq tunngavigalugu suliassanik suliarinnittoqartartoq, tassani § 8-mi ersarissumik allassimavoq ingerlatseqatigiiffik ukiup siuliani aalisarsinnaanermut akuersissuteqarnikuuppat aalisarsinnaanermut akuersissummik tunineqarsinnaasoq. Qinnuteqartut aalajangersagaq taanna innersuussutigalugu akineqartarnikuupput, tamannalu naamalluinnartutut isigineqarnikuuvoq.

Naalakkersuisoqarfilli aqutsinermi misissuinermi inassuteqaatit tunngavigalugit aqutsinermi suleriaatsimik sukaterinikuuvoq, taamaalilluni piumasaqaatit avataasiorluni aalisarnermik nalilersuinerit tunngavigineqartut tamatigut innersuussutigineqartarlutik, tamannalu nalunaarummi § 12-imi maannakkut allaqqavoq.

Tamassuma saniatigut oqaatigineqarsinnaavoq avataasiorluni aalisarnermik aqutsinermi pisassiissutinik agguaassinermi naammattunik tunngavilersuutinik imaqartunik ukiumoortumik oqaaseqaateqartoqartarneranik piffissami sivisuumi suliariaaseqartoqarnikuusoq. Taamaalilluni aqutsinermi suleriaatsimut nalinginnaasumut tunngatillugu pisussaaffik eqqortinneqarnikuuvoq.
Aalisarnermik aqutsinermi suliassanik suliarinnittarnermut ilitsersuummi erseqqissaaqqittoqartussaavoq, aamma sinerissap qanittuani aalisarnermik aqutsinermi, aamma inatsimmut atuuttumut tunngatillugu suleriaaseq sukaterneqareernikuuvoq.

Jens Immanuelsen oqaaseqaateqarpoq: Aalisarnermik aqutsinermi pitsaasumik suleriaaseqartoqarnissaa malillugu suliassanik suliarinnittoqartarnera tatigilluinnarpara. Naalakkersuisoqarfik suliassat nukinginnartut aalisarnermillu nalinginnaasumik aqutsinerup saniatigut 2020 tamaat aqutsinermik nutarterinikuuvoq. Allaffeqarfik aqutsiveqarfimmut angisoorujussuarmut sanilliullugu sulisukitsuararsuuvoq soorunalumi ilaatigut kukkusoqartarpoq, ataatsimulli isigalugu aalisarnermik aqutsinerup pitsaasusaa qaffasissorujussuuvoq.

Tamassuma saniatigut ilisimatitsissutigerusuppara naalakkersuisoqarfik internetikkut paasissutissiisarnerup qaffasissusia pitsanngorsarniarlugu suliamik annertuumik maannakkut suliaqartoq. Tamanna ilaatigut sullissivik.gl suleqatigalugu ingerlanneqarpoq, taannalu atuisunit atoruminarnerulersinniarlugu maannakkut nutarterneqarpoq. Piumasaqaatinik, akuerineqarnissamut piumasaqaatinik, qinnuteqartarnermik, suliassanik suliarinnittarnermik allaaserisanik nammattunik atuisuniillu atoruminartunik suliaqarnikuuvugut, taamaaliornermilu maannakkut nittartakkamiittunik aalisartunut paasiuminarnerulersitsinissaq atuisuniillu atoruminarnerulersitsinissaq qulakkeerneqassaaq. Aamma qinnuteqarnermi immersugassat tamarmik nutarterneqarnikuupput aqutsinermillu misissuinermi inassuteqaatit malinneqarlutik, qinnuteqarnermut killissarititanik aamma angallatit pillugit uppernarsaataannik piginnittuunermillu uppernarsaatinik erseqqissaaneq ilanngullugu. Qinnuteqarnermi immersugassat aamma nittartakkamiilissapput, taamaalilluni qinnuteqarnermi immersugassat siunissami digitalinngorlugu immersorneqarsinnaalissallutik Naalakkersuisoqarfimmullu toqqaannartumik nassiunneqartassallutik.


Paasissutissanik suli allanik, uani taaneqanngitsunik pissarserusukkaanni Aalisarnermut, Piniarnermut Nunalerinermullu Naalakkersuisoqarfimmut saaffiginnittoqarsinnaavoq, e-mail: apnn@nanoq.gl