Islandip naalakkersuisuisa nalunaarusiaq ”Greenland and Iceland in the New Arctic” saqqummersinnikuuaat tamanullu saqqummiullugu

2019-imi Islandip nunanut allanut tunngasutigut naalakkersuisuat Gudlaugur T. Tórdarson Islandimi suleqatigiissitamik imaluunniit ’Kalaallit Nunaat pillugu komité’-mik pilersitsinikuuvoq, suleqatigiissitallu taassuma Islandip aamma Kalaallit Nunaata akornanni suleqatigiinnerup annertusarnissaanut inassuteqaatit suliarinikuuai. Suleqatigiissitap aamma maanna illugiilluni suleqatigiinneq misissugassarinikuuaa. Nalunaarusiaq Islandimi siusinnerusukkut nunanut allanut tunngasutigut naalakkersuisuata suleqatigiissitami siulittaasuusup Össur Skarphedinsson-ip suliaraa, suleqatigiissitamilu ilaasortatut Unnar Brá Konradsdóttir aamma Óttarr Gudlaugsson toqqarneqarput.

Suleqatigiissitaq Islandimi Kalaallit Nunaannilu soqutigisaqartunik 2019-ip aamma 2020-p ingerlanerani arlaqaqisunik ataatsimeeqateqartarnikuuvoq.

Nalunaarusiaq Islandimi nunanut allanut tunngasutigut ministereqarfimmit pissarsiariniarneqarsimavoq, taamaalillunilu Islandimi isiginiarneqartut pillugit Islandimiunit nalunaarusiaalluni, nalunaarusiamilu inassutaasut taamaallaat suleqatigiissitameersuupput, taamaammallu taakku pillugit suli naalakkersuinikkut aalajangiisoqarnikuunani. Nalunaarusiap ilitsersuutitut atorneqarsinnaanera nalunaarusiami innersuussutigineqarpoq, imaluunniit pissutsit suleqatigiissutigineqarsinnaasut pillugit assersuutissaalluni.

Taamaammat siullermik Islandimi nunanut allanut tunngasutigut naalakkersuisup taassumalu naalakkersuisoqarfiata suna ukkatarineqassanersoq suullu aalajangiiffigineqassanersut immikkut aalajangigassaraat. Tamatuma saniatigut nunanut allanut tunngasutigut pingaarnertut inerniliussat Naalakkersuisumut aamma Nunanut allanut Naalakkersuisoqarfimmut attuumassuteqartuusut saniatigut, inassuteqaatit amerlasuut kiisalu Kalaallit Nunaanni suliffeqarfiit kattuffiillu suleqatiginerisa annertusarnissaannut siunnersuutit naalakkersuisoqarfinnut allanut arlalinnut tunngassuteqartuusut naatsorsuutigisariaqarpoq, tamatumanimi nalunaarusiami siunnersuutigineqartutut suleqatigiinnermut iluaqutaasinnaasut aamma isummerfigineqartariaqarmata.

Nunat taakku illugiit Nuummi Reykjavikimilu naalakkersuinikkut attaveqarnermut sinniisoqarfeqarput, ataatsimullu isigalugu naalakkersuinikkut suleqatigiinnerup saniatigut aningaasarsiornermi ineriartorneq nunallu iminnut attaveqaqatigiinnerat annertusiartorput.

Pingaarnertut immikkoortut soorlu ataatsimut isigalugu niuernermik, peqqissutsimik, aalisarnermik, attaveqaqatigiinnermik, aatsitassalerinermik, nukissiornermik, silaannarmik, takornariaqarnermik Issittumillu attuumassuteqartut saniatigut Kalaallit Nunaata kangia immikkut isiginiarneqarpoq, tassami nuna tamanna Islandip sanilerimmagu qaninnerpaaq, ukiunilu amerlaqisuni nuna tamanna Islandimiunit immikkut attaveqarfigineqartarsimammat.
Nalunaarusiaq 99-nik tigussaasunik inassuteqaatitaqarpoq, inassutillu qulit pingaarnerutinneqarput, taakkumi pisortatigoortumik naalakkersuinikkut isumaqatigiissutinik suliatigullu inassuteqaatinik tunngaveqarmata.
Nalunaarusiaq islandimiusut allataq tuluttuunngortinneqarnikuuvoq, katillugillu 272-inik qupperneqarluni.

Nunanut allanut Nukissiuuteqarnermullu Naalakkersuisoq Steen Lynge tamatumunnga atatillugu ima oqaaseqarpoq:
”Kalaallit Nunaata Islandillu akornanni annertunerusumik suleqatigiinnissamut Islandimi Naalakkersuisut periarfissanik inassuteqaatinillu amerlaqisunik misissuinermut suliaqarnermullu nukippassuarnik atuisimanerat pissanganarteqaara soqutinartillugulu. Islandimi Ministereqatiga Gudlaugur T. Tórdarson peqatigalugu video atorlugu ataatsimeeqatigeeqqammerpugut, tassanilu tunngavigineqartoq nalunaarusiarlu saqqummiuppai nalunaarusiamilu saqqummiunneqartut siunertat inassutillu pitsaasut amerlaqisut pillugit suliaqarnissaq timitaliinissarlu neriuutigilluaqaara. ”

Sukumiinerusumik paasisaqarusukkuit: Sinniisoqarfimmi pisortaq Jacob Isbosethsen, jsis@nanoq.gl +3546655610

Nalunaarusiaq uani nassaariuk (linki)