Naalakkersuisoq Tunumi qilalukkat qernertartassat pillugit eqqunngitsumik nassuiaassinikuunngilaq

Tasiilami Partii Naleqqami Siulittaasoq, Emanuel Nûko, AG sap.ak. 03 20. januar 2021 aqqutigalugu oqaaseqarpoq TV-ikkut aallakaatitassiami sallusimasungagooq eqqunngitsumik nassuiaanikkut, Tunumi qilalukkanut qernertanut pisassiissutit ”qilalugaqatigiinnut-Kangerlussuaq”-mut tunniunneqartut susassaqartunut tusarniarneqarsimanngitsunngooq agguaanneqannginneranni. Tassami Emanuel Nûko isumaqarpoq qilalugaqatigiinnut ”Kangerlussuaqmut pisassiissuutit Tasiilap avannaatungaaniittut pillugit sumilluunniit tusarniaasoqarsimanngitsorooq. Tamanna Emanuel Nûkomit kukkuneruvoq paatsuuinerullunilu.

Naalakkersuisut Tunumi piniartut assigiinngitsuliorfiginngilai. Naalakkersuisut ulloq Januaarip aappaani 2020-imi aalajangerpaat ukiumut pisassiissutinut pilersaarut 2020-imiit 2023 ilanngullugu Tunumi atuuttussaq atuutsinneqassasoq. Tamanna aalajangerneqarpoq ilaatigut uumassusilerisut inassuteqaataat aamma Tunumi neqissaqarniarneq kiisalumi kulturip attatiinnarnissaa aallaavigalugit, Tunumi qilalugaqatigiit qernertat pillugit pisoq ilungersunartoq saqqummiunneqareerneratigut. Piffinni taaneqartuni pisassiissutinut pilersaarummi aamma neqissaqarniarneq kiisalu kulturip attatiinnarnissaa pillugu Naalakkersuisut pingaartissimavaat Ittoqqortoormiini aamma Tasiilami eqqaanilu neqissaqarniarneq aamma kulturip attattuarnissaa.

Decemberimi 2020-imi uanga Aalisarnermut, Piniarnermut Nunalerinermullu Naalakkersuisunut ilaasortatut qilalukkanut qernertanut pisassiissutinut 2021-moortunut aalajangiisimavunga, tassanilu Naalakkersuisut januaarip aappaani 2020-imi Tunumi 2021-imi qilalukkanut qernertanut pisassat aalajangiussaat malissimallugit.

Upernaami 2020-imi Naalakkersuisut ilanngullugu aalajangiipput immikkut pisassiissutinik qilalukkanik qernertanik arfineq pingasuusunik Tasiilamut eqqaanullu pisasseeqqinniarluni, piffimmi neqissaqarniarneq eqqarsaatigalugu. Taamaammat kukkuneruvoq Emanuel Nûko-p allassimanera Naalakkersuisut Pinngortitaleriffiup uumassusilerisut inassuteqaataat toornermiit toornermut maleqqissaaraat. Naluneqanngitsutuut Tunu tamakkerlugu uumassusilerituut inassuteqaatigivaat qilalukkanik pisaqartoqassanngitsoq.

Ukiut tamaasa Naalakkersuisoqarfik sapaatit akunnerni tallimani piniagassat killilersukkat pillugit tusarniaasarpoq, minnerunngitsumik tusarniaanerit qilalukkanut qaqortanut aamma qernertanut ukiup tullissaanut pisassiissutissat pillugit. Tusarniaareernerup kingorna pisassiissutissat aalajangerneqartut allaanerusinnaasarput tusarniutigineqatumiit, tusarniaanermi akissuteqartut aalajangiinerillu apeqqutaallutik. 2019-imi 2020-imut qilalukkanut qaqortanut aamma qernertanut pisassiissutissat pillugit tusarniaanermi, 2020-imiit 2023 ilanngullugu Tunumi pisassiissutinut pilersaarut saqqummiunneqarpoq nassiussuunneqarlunilu kommuninut tamanut, KNAPK-imut allanullu kattuffinnut attuumassuteqartunut. Tusarniaassutigineqartoq tusarniaanermullu akissuteqaatit Namminersorlutik Oqartussat tusarniaavianut ilineqarput. Pisassiissutinut pilersaarummi takuneqarsinnaavoq 2020-imi qilalugaqatigiit-”Kangerlussuaq”-mut pisassiisoqanngitsoq, taamaattorli 2021-imi 2023-ip tungaanut pisassinneqassasoq. Pisassiissutit taakku Aqutsiveqarfik Tasiilaq-miit pisarineqarsinnaapput.

Pisassiissutinut pilersaarut assinga 2020-imi ukiakkut tusarniaanermi 2021-imut qilalukkat qaqortanut aamma qernertanut pisassiissutissanut tunngassuteqartumi nassiunneqarpoq, tusarniaaneq sapaatit akunnerini arfineq marlunni ullunilu tallimanik sivisussuseqartussaagaluaq, sivitsorneqartoq sapaatip akunneranik KNAPK-miit kissaateqartoqareernerata kingorna. Taamaammat kukkuneruvoq Emanuel Nûko allassimanera piniartut tusarniarneqarsimanngitsunngooq. Tusarniarneqarput.


Sukumiinerusumik paasisaqarusukkaanni immikkoortortaqarfimmi pisortaq Amalie A. Jessen attavigiuk, oqarasuaat 34 53 04, e-mail: Amalie@nanoq.gl