Kangerlussuup siunissaa pillugu sulinermi killiffik

COVID-19 unammillertitsigaluartoq Kangerlussuup siunissaa pillugu sulineq siumut ingerlavoq. Suleqatigiissitat arlallit ataanni suliami aallaaviit arlallit aallaavigalugit sulisoqarpoq.

Illersornissaqarfiup mittarfimmik atuiinnarnissaa pillugu naalagaaffiup aamma Naalakkersuisut akornanni tunngaviusumik isumaqatigiissummi, 18. september 2019-imeersumi imatut aalajangersaasoqarpoq:

”Issittumi sumiiffinni Illersornissaqarfiup suliassaasa suliarineqaannarnissaat siunertaralugu, Kangerlussuarmi mittarfiup Illersornissaqarfiup timmisartuinut atorneqaannarsinnaanissaa, pisariaqartinneqarpoq.

Naalakkersuisut Danmarkimilu naalakkersuisut tamanna tunngavigalugu isumaqatigiissutigaat Illersornissaqarfiup Kangerlussuarmi mittarfimmiiginnarnissaa aammalu mittarfimmi atuisinnaanissaa, mittarfimmilu immikkut ittumik innuttaasusunut timmisartunit atuutsinneqarnissaa. Aammattaaq mittarfik Kalaallit Nunaannit piginnittuuffigineqarnera allanngortinneqassanngitsoq, aammalu mittarfik qanoq iliorluni Illersonissaqarfimmut atugassiissutigineqarsinnaaneranut ilusiliamik suliaqarnissaq siunertaralugu ataatsimoorluni suliaqarneq aallartinneqassasoq isumaqatigiissutigaarput. Suliaqarneq suliakkiissutinut najoqqutassaq ilanngunneqartoq 7. maj 2019-imeersoq aallaavigalugu ingerlaqqissaaq.”


Mittarfik pillugu:
Kangerlussuarmi mittarfiup annertunerusumik iluarsaanneqartariaqarnera pilugu pisariaqartitsineq suliami pingaarutilittut inissisimavoq.

Illersornissaqarfimmit oqaatigineqarpoq, aamma siunissami mittarfiup timmisartut maanna atorneqartut atorlugit timmisartuussivigineqartarnissaa pisariaqartinneqartussaasoq, taamaattumillu mittarfik 2500 meterinik takissusilik pisariaqartinneqartoq. Taamatuttaaq Amerikamiut illersornissaqarfiata timmisartuussinissamik pisariaqartitsineranut, kiisalu siunissami inuinnarnik timmisartuussinissamut pisariaqartitsinermut uppernarsaasiornissaq suliarineqarpoq.

Iluarsaassinerup 2023-p naanerani aallartinneqarsinnaanissaa naatsorsuutigineqarpoq.

Mittarfik inuinnaat angallanneqarnerinut aammalu illersornissaqarfimmit atorneqarsinnaasussaavoq – ullumikkutut.

Nutaamik umiarsualiviliorsinnaanissamut aqquserniorsinnaanermullu pilersaarusiaq pillugit:
2019-imi Aningaasanut Inatsit pillugu isumaqatigiissusiornerup kingunerisaanik, Kangerlussuarmi nutaamik umiarsualiviliornissap pisariaqartinneqarneranik naliliineq aammalu imminut akilersinnaassutsimik misissuineq sulissutigineqarput. Aqquserniornermi killiffik tusagassiorfinnut nalunaarummi, 16. november 2020-meersumi allaaserineqarpoq.

Kangerlussuup siunissaa pillugu:

Suliniutinik arlalinnik aallartitsisoqarpoq, tassanilu suliassat Kangerlussuarmi mittarfiup ingerlanneqarneranut ilaatinneqanngitsut Mittarfeqarfinniit avissaartinneqarnissaat aalajangersimasumik sulissutigineqarpoq. Tassani inissianik illunillu attartortitsinerit, eqqaavilerinerit, upalungaarsimanermi suliassat, pilersuineq allallu pineqarput. Suliniutini nunaqarfimmi pissutsit nalinginnaanngorsarneqarnissaat, taamaalillunilu kommunip najugaqartullu pitsaanerpaamik ineriartortitsinissamik kissaataannut tapersersuinissaq qulakkeerniarneqarput.

Suleqatigiissitat pillugit:
Kangerlussuup siunissaa pillugu suleqatigiissitaq pingaarneq Qeqqata Kommuniata, Arctic Circle Business-ip, Ineqarnermut Attaveqaqatigiinnermullu Naalakkersuisoqarfiup aamma Inuussutissarsiornermut Suliffeqarnermullu Naalakkersuisoqarfiup akornanni pilersinneqarpoq.

Tassunga ilanngullugu suleqatigiissitat attuumassutillit marluk, Kangerlussuarmi umiarsualivimmik nutaamik aamma Sisimiut Kangerlussuullu akornanni aqquserniassamik suliaqartussat pilersinneqarput.

Tamatuma peqatigisaanik suleqatigiissitaq, Illersornissamut Ministereqarfiup, Ineqarnermut Attaveqaqatigiinnermullu Naalakkersuisoqarfiup, Nunanut Allanut Nukissiuuteqarnermullu Naalakkersuisoqarfiup, Aningaasaqarnermut Naalakkersuisoqarfiup aamma Mittarfeqarfiit akornanni ingerlanneqarpoq, Illersornissaqarfiup Kangerlussuup mittarfeqarfianiiginnarnissaanut atuiinnarnissaanullu najoqqutassiamik suliaqartumik.

Suleqatigiissitani ilaasortai ilai suleqatigiissitani arlalinni ilaasortaapput, aammalu aqqutissat suleqatigiillu assigiinngitsut akornanni ingerlaavartumik ataqatigiissaarisoqarpoq, paasissutissat attuumassutillit tamarmik suleqataasunut attuumassutilinnut apuuttarnissaannik qulakkeeriffiusussamik.

Suleqatigiissitani suliat ingerlapput, aammalu suliap ingerlanerani pisussaannartut llanngussisoqartarsinnaavoq.


Inussiarnersumik inuulluaqqusilluta

Vittus Qujaukitsoq, Aningaasaqarnermut Naalakkersuisoq
Karl Frederik Danielsen, Ineqarnermut Attaveqaqatigiinnermullu Naalakkersuisoq
Jens-Frederik Nielsen, Inuussutissarsiornermut Aatsitassanullu Naalakkersuisoq
Steen Lynge, Nunanut Allanut Nukissiuuteqarnermullu Naalakkersuisoq
Malik Berthelsen, Qeqqata Kommuniani Borgmesteri

Annertunerusumik paasisaqarusunnermi Ineqarnermut Attaveqaqatigiinnermullu Naalakkersuisoqarfik attaveqarfigineqassaaq, uunga box909@nanoq.gl.