Perorsaasunut isumaqatigiissut nutaaq akuerineqarpoq

Perorsaasut Kattuffiat NPK ulloq 18. januar 2021 nalunaaruteqarpoq ilaasortat taasisinnaatitaasut sapaatip akunnerata kingullermi taasitinneqarnerat naammassineqarsimasoq. Taasinerit atorsinnaasut naatsorsornerisa takutippaat isumaqatigiissutigineqartoq ilaasortat 80%-iisa akuerisimagaat. Isumaqatigiissut nutaaq 31. marts 2024-p tungaanut atuutissaaq.

Angusat aqqutigalugit perorsaasut akissarsiaat malunnartumik qaffassapput, tamannalumi isumaqatigiinniarnerni qitiutillugu anguniagaasimavoq. Angusaq pingaarutilik alla tassaavoq allaffissornermi suliat aalajangersimasumik piffissaqarluni suliarineqarsinnaalerneri. Tamatuma ilaatigut kingunerisaanik angajoqqaanik oqaloqatiginnittarnissat perorsaasunit pitsaanerusumik piareersarfigineqarsinnaalissapput. Ulloq unnuarlu paaqqinnittarfinni, najoqatigiiffinni najugaqarfinnilu forstanderinut taakkulu tullersortaanut pisortatut akisussaaffiit atorfimmut nutaamik tapeqalersitsinikkut pitsanngorsaaffigineqarnissaat pingaartinneqarsimavoq. Taamaasillutik perorsaasut pisortallu isumaqatigiissummi nutaami isiginiarneqarsimapput.

Isumaqatigiinniarnerit naammassineqarneri Aningaasaqarnermut Naalakkersuisumit Vittus Qujaukitsumit Namminersorlutik Oqartussat kommunillu sinnerlugit annertuumik naammagisimaarneqarpoq. Isumaqatigiissutit nutaat aqqutigalugit massakkut atorfeqartut tigummiinnarsinnaanissaat perorsaasutullu ilinniarsimasut atorfinitsinneqarsinnaanissaat tunngavissaqarlualerpoq taamaasilluni meeqqat toqqissisimanissaannut iluaqutaasussamik perorsaasutut ilinniarsimasut amerlanerusut atorfinitsinneqarsinnaalissapput.

Ilaasortat taasitinneqareernerisigut isumaqatigiissutit atsiorneqarsinnaalerput taamaasillutillu akissarsiatigut atugassarititat nutaat atuutsilersinneqarlutik.

Annertunerusumik paasisaqarusunnermi saaffigineqarsinnaavoq Aqutsoqarfilmmi Pisortaq André Steenholdt-Guttesen, email andg@nanoq.gl, oqa.: +299 34 50 00