Kinguaassiuutitigut innarliinerit akiorniarlugit sulinermi politiit suleqatiginerat pingaaruteqarpoq

Kalaallit Nunaanni Politiit nalunaarusiaat Naalakkersuisut soqutigalugu tiguaat: Nalunaaruteqarnermi akimmiffiit – Meeqqanut inuusuttunullu kinguaassiuutitigut innarliinernik nalunaaruteqartarnernik misissueqqissaarneq.

Kalaallit Nunaanni Politiit Nalunaaruteqarnermi akimmiffiit – Meeqqanut inuusuttunullu kinguaassiuutitigut innarliinernik nalunaaruteqartarnernik misissueqqissaarneq ulloq 18. januaari saqqummiuppaat, tassanilu kinguaassiuutitigut innarliinerpassuit assigiinngitsunik peqquteqartumik sooq nalunaarutigineqarneq ajornerat tikkuuppaa.
”Meeqqanut inuusuttunullu kinguaassiuutitigut innarliinerit akiorniarlugit sulineq pingaarutilerujussuuvoq. Ilisimasaqarpallaarsinnaanngilagut – ilisimasaqarnerujartortilluta innarliinernik pinaveersaartitsilluarnerullutalu innarlerneqarsimasunik ikiuilluarnerusinnaavugut” Isumaginninnermut, Ilaqutariinnut Inatsisinillu Atuutsitsinermut Naalakkersuisoq Martha Abelsen oqarpoq.
Kalaallit Nunaanni Politiit nalunaaruteqartarnermi akimmiffiit qanoq nungutikkiartorneqarsinnaanerannik nalunaarusiaminni innersuussuteqarput.
”Meeqqanut inuusuttunullu kinguaassiuutitigut innarliinernik nalunaaruteqarnissamut akimmiffinnik nungusaaniarluni iliuusissatut politiit innersuussutaat, meeqqanut inuusuttunullu kinguaassiuutitigut innarliinerit akiorniarlugit sulinermut periusissiamut pinaveersaartitsinermullu naleqquttorujussuupput.

Suliaq erloqinaraluarluni politiit misissueqqissaarnerisa uagutsinnut aamma ilaatigut Angajoqqaat meeqqanik sumiginnaasarnerat akiorniarlugu nuna tamakkerlugu iliuusissanut pilersaarut 2020-2030, Kalaallit Nunaanni meeqqanut inuusuttunullu atugarliortunut pitsaanerusumik suliniuteqarnissaq pillugu kalaallit qallunaallu oqartussaasoqarfiisa assigiinngitsunik suliallit akornanni suleqatigiinneq minnerunngitsumillu Killiliisa - Naalakkersuisut kinguaassiuutitigut atornerluineq akiorniarlugu periusissiaat 2018-2022 aqqutigalugit, suliatsinnut ingerlareersunut naapertuunnerat nuannaarutissaavoq.

Meeqqanut inuusuttunullu kinguaassiuutitigut atornerluinerit akiorniarlugit sulinitsinni politiit suleqatiginerat pingaarutilittut isigaara, suliarlu pillugu suleqatigiinnitta ingerlaqqinnissaa qilanaaraara” Isumaginninnermut, Ilaqutariinnut Inatsisinillu Atuutsitsinermut Naalakkersuisoq Martha Abelsen oqarpoq.

Paasisaqarnerorusukkaanni Naalakkersuisumut allatsi Inger Heilmann Larsen uunga e-mail: ihla@nanoq.gl imaluunniit oq. + 299 554160 attavigineqarsinnaavoq.