Uummannami tuniluuttoqarneranut takussutissaqanngilaq

Arfininngormat 16. januar 2021 Uummannami tunillatsissimasumut qanillisimasut tamarmik misissorneqarput. Misissukkat tamarmik Ilulissani laboratoriami misissoqqissaarneqarput, taakkulu tamarmik tunillatsittoqarsimaneranik takussutissaqanngillat. Tassalu tuniluuttoqarneranut takussutissaqanngilaq. Tunillatsissimasoq Uummannamiit aallareerpoq.

Angerlarsimaannaqqusaasut ilamininngui suli ullualunnguani angerlarsimaannassapput misissorteqqissallutillu. Tunillatsiffiusinnaasumik qanillisaqarnermiit ullut ikinnerpaamik arfineq marluk qaangiuppata aatsaat tunillatsissimannginneq naammaginartumik qulakkeerneqarsinnaavoq. Taamaattumik suli tunillatsissimasunik paasisaqarnissaq annikitsumik ilimanaateqarpoq, taamaattumillu kikkut tamarmik Covid-19-imut ersiuteqartoqalernissaa eqqumaffigisariaqarpaat.

Sapaatit akunneranni tulliuttumi inuppassuit Kalaallit Nunaannut tikittussaapput. Tamanna pissutigalugu nuna tamakkerlugu tunillaasinnaasunik tikittoqarnissaa ilimanaateqartorujussuuvoq. Taamaattumik tunillaasinnaaneq Uummannamiinnaq pissanngilaq.

Unammilligassaq alla tassaavoq, Covid-19 Tuluit Nunaanneersoq, Danmarkimi sukkasuumik tuniluutilersoq nutaaq tunillaatianerujussuarlu. Taamaattumik Kalaallit Nunaannut tikittoqassanngitsoq oqaatigineqarsinnaanngilaq. Kikkut tamaasa piffissami aggersumi innersuussutinik malinnilluaqqullugit, aammalu tusatsiakkanik ingerlatitseqqittarnermi peqataaqqunagit kaammattorneqarput.