Uummannami Covid-19-imik tunillatsissimasoq

Inuk ataaseq Danmarkimiit Uummannamut tikissimasoq, tikinnerminiit ullut arfineq aappaanni misissortinnermini tunillatsissimasoq paasineqarpoq. Angalanermini Uummannamiinnerminilu qanillisimasaanik tamanik tunillatsittoqarsimasinnaaneranik misissuineq tamakkiisoq aallartinneqarpoq. Tunillatsissimasinnaasunik paasiniaaneq politiit nakorsaaneqarfik suleqatigalugu ingerlappaat.

Qanillisimasinnaasai tamarmik nassaarineqarput aammalu tuniluuttoqalersinnaanera pinngitsoortinniarlugu angerlarsimaannaqqullugit ilisimatinneqarput. Uummannami innuttaasut akornanni tuniluuttoqalersinnaanera annikitsuaraasoq naliliisoqarpoq.

Angerlarsimaannaqqusaasut tamarmik ullumikkut Corona pillugu Allattoqarfimmi sulisunit attaveqarfigineqassapput, piffissap angerlarsimaannarfigeqqusaasup sivisussusissaa misissortinnissamullu periarfissat pillugit paasissutissinneqassallutik.

Piffissami aggersumi Kalaallit Nunaannut tikittussat amerlasussaapput. Piffissami tassani tunillatsissimasut arlallit tikinnissaat ilimanaateqartorujussuuvoq. 2021-mi januaarip sinnerani Kalaallit Nunaanni tunillaassuisinnaanerup ulorianartorsiorfiunera annertusingaatsiassaaq.

Taamaattumik piffissami aggersumi sillimaffigisassat tamarmik, tuniluuttoqarsinnaaneranut annikillititsisussat eqqumaffigilluarneqassasut inassutigineqarpoq:

Hold afstand

Allat qanillinaveersaakkit aamma allat timikkut attornaveersaakkit meterinillu marlunnik ungasitsigalusi

 

Vask hænder

Eqqaamallugu eqqortumik assavit asannissai

Bliv hjemme

Angerlarsimaannarit,  tunillatsissimanermik ersiuteqaruit napparsimaveqarfik qaninnerpaaq attavigiuk