Meeqqanut Paarisa

Peqqissuseq atugarissaarnerlu pillugit ikiortissarsiorneq ilisimasassarsiornerlu meeqqanut ajornanngitsuussaaq. Taamaattumik nittartagaq Paarisa.gl paasissutissanik meeqqanut naleqqussakkanik ilaneqarpoq.

Meeqqanut Paarisa januaarip aqqarnanni Katuami malunnartinneqarlunilu nalliussineqarpoq. COVID-19 pissutigalugu killilersuisoqarmat immikkut ittumik qaaqqusat ilagalugit tamanna matoqqasumik nalliussineqarpoq. Meeqqanik sullissisut meeqqallu peqataasut ilagaat. Saqqummersitsineq Naalakkersuisut facebookimi quppernerannit toqqaannartumik aallakaatinneqarpoq.

Peqqissutsimut Naalakkersuisoq Anna Wangenheim aamma Isumaginninnermut, Ilaqutariinnut Inatsisinillu Atuutsitsinermut Naalakkersuisoq Martha Abelsen pisumut qaaqqusisuupput.

- ”Naalakkersuit tungaanniit neriuutigaarput Paarisa.gl-imik aamma Meeqqanut Paarisa-mik pilersitsineq iluaqutigalugu meeqqat inuusuttullu peqqinneq atugarissaarnerlu aamma sumut ikiortissarsiortoqarsinnaanera pillugu paasissutissanik ujartuineq ajornannginnerutilissagaat,”
taama Isumaginninnermut, Ilaqutariinnut Inatsisinillu Atuutsitsinermut Naalakkersuisoq, Martha Abelsen, tikilluaqqusilluni oqalugiarnermini oqarpoq.

Peqqissutsimut Naalakkersuisoq, Anna Wangenheim, tikilluaqqusilluni oqalugiarnermi ima nangippoq:

- ”Paasissutissanik pissarsisinnaaneq meeqqat inuusuttullu ilisimasaqalernissaannut tunngaviuvoq. Ilisimasat tungavigalugit inuunermi pitsaasunik aalajangiisinnaassapput. Taamaattumik paasissutissat, ilisimasat ilinniarnerlu pillugit sulineq meeqqat inuusuttullu pitsaasumik peqqinnartumillu meeraanissamut, ineriartornissamut periarfissaminnillu tamakkiisumik piviusunngortitsinissamut pitsaanerpaanik periarfissikkumallugit ataatsimoorussamik anguniakkatta ilagaat.”

Saqqummersitsinermi aamma Meeqqat Illersuisuat, Aviâja Egede Lynge, meeqqat paasissutissanik ujaasinissamut paasissutissinneqarnissamullu pisinnaatitaaffii pillugit saqqummiussivoq. Nalliussinermi aamma nipilersortoqartarmat Naja Paarnuna Vahl nipilersoqatigisartagaalu Ulinnerit marloriarlutik nipilersorput. Tamatuma saniatigut meeqqanut Paarisami filmit ineriartortinneqartut marluk siullermeerlutik takutinneqarput.

Meeqqanut Paarisa www.paarisa.gl-imi takuneqarsinnaavoq.

Paasisaqarnerujumallutit attavigiuk immikkoortortaqarfiup pisortaa Ditte Sølbeck oqarasuaatikkut +299 34 60 37 e-mailikkulluunniit ditt@nanoq.gl