Eqqakkat pillugit nalunaarut nutaaq

Naalakkersuisut eqqakkat pillugit nalunaarummik nutaamik aalajangiussaqaqqammerput. Nalunaarut eqqagassalerinermut sinaakkusersuiffiuvoq, ilaatigullu eqqaanermiit atueqqittarnerup aallunneqarnerulernissaa siunnerfigineqarluni.

Ukiuni makkunani eqqagassalerineq pisoqarfiusorujussuuvoq, aammalu eqqakkat isumalluutitut isigineqaleriartorput. Eqqaasarnermik pinaveersaartitsinissaq eqqagassalerinerlu mingutsitsinngitsunut nuunniarnermi qitiusumik inissisimapput, aammalu nuna tamakkerlugu eqqagassalerinermik pitsanngorsaanissaq suli sulissutigineqarpoq. Tamanna tunngavigalugu kommunit, ulluinnarni eqqagassalerinermik isumagisaqartut qanittumik suleqatigalugit eqqakkanut nalunaarummik nutaamik suliaqarnissaq pisariaqartinneqarpoq.

”- Nuna tamakkerlugu eqqagassalerinermik pitsanngorsaanermi annertuumik alloriaqqippugut. Eqqakkat pillugit nalunaarutip nutaap, kommunit qanittumik suleqatigalugit suliarineqartup atuutilerneratigut eqqaanissamut taarsiullugu atueqqittarneq atoqqiisarnerlu siunnerfigaagut. Tamanna assut nuannerpoq, aammalu avatangiisitsinnut, pinngortitamut silallu pissusianut allanngueqataassaaq”,
Suliffeqarnermut, Ilisimatusarnermut Avatangiisinullu Naalakkersuisoq Jess Svane oqarpoq.

Inatsisinut atuuttunut naleqqiullugu allannguutit


Eqqakkat pillugit nalunaarummi nutaami inatsisinut atuuttunut naleqqiullugu ilaatigut suliassaqarfiit uku annertuumik allannguiffigineqarput:
  • Suliassaqarfimmi oqaatsit atorneqartut assigiissaarneqarnissaat siunertaralugu taaguutit allattorsimaffiannik annertuumik atuutsitsisoqalissaaq.
  • Kommunini eqqagassalerinermut pilersaarusiortarnerit pillugit maleruagassanik sukumiisunik aalajangersaasoqarpoq, kiisalu kommunit ataatsimoorlutik eqqagassalereqatigiiffiata eqqakkanut pilersaarusiorsinnaanera kommuninit aalajangerneqarsinnaalissaaq.
  • Mingutsitsisup akiliisarnissaanik atuutsitsilernissaq nukittorsaaffiginiarlugu eqqakkanut akiliutinik naatsorsuisarnermut tunngavissanik aalajangersaasoqarpoq.
  • Kommunalbestyrelsit illoqarfinni nunaqarfinnilu inuit tamat ornittagaanni arsakoorfilersuisarnissaat piumasarineqarpoq.
  • Eqqakkanik ammaannartumik ikuallaasarnissamut Naalakkersuisut piffissamut killilikkamut immikkut ittumik akuersissuteqarsinnaanerat periarfissinneqarpoq.
Eqqakkanut nalunaarut nutaaq tamakkerlugu atuarneqarsinnaavoq, uani.

Tusarniaanermi akissuteqaatit tiguneqartut aamma Ilisimatusarnermut Avatangiisinullu Naalakkersuisoqarfiup tusarniaanermi akissuteqaataa atuarneqarsinnaapput, uani.

Naalakkersuisut eqqagassalerinermut pilersaarutaat
Naalakkersuisut 2020-2031-imut eqqagassalerinermut pilersaarusiartik 2020-mi tamanut ammasumik saqqummiuppaat, tassanilu nuna tamakkerlugu eqqaasarnermut politikkimi siunnerfiusut, aammalu kommunini eqqagassat pillugit pilersaarusiortarnermi sinaakkutissat aalajangersarneqarput.

Eqqagassalerineq tunngavimmigut allanngoriartorpoq. Ukiuni tulliuttunni eqqagassalerinermi suliniutinut nuna tamakkerlugu eqqakkat pillugit ataatsimoortumik aaqqiissutissat tunngavigineqarput. Tamatuma kingunerisaanik ukiuni tulliuttuni nuna tamakkerlugu eqqakkanik ikuallaaviit marluk nutaat, kommunit ataatsimoorlutik eqqagassalereqatigiiffiannit ESANI A/S-imit ingerlanneqartussat sananeqassapput. Taakku saniatigut aamma nuna tamakkerlugu tigooqqaaviit pilersinneqassapput, tassanngaanniillu eqqakkat nuna tamakkerlugu ikuallaavinnut assartorneqartassapput. Aaqqissuussinermi nutaami eqqagassalerinermik pitsaasumik, avatangiisit peqqissuserlu eqqarsaatigalugit isumannaatsumik, aammalu eqqakkanik, aammattaaq nukissiuutitut atorluaaffiunerpaasumik pilersitsinissamik qulakkeerinissaq siunertarineqarpoq.

Naalakkersuisut 2020-2031-imut eqqagassalerinermut pilersaarutaat atuarneqarsinnaavoq, uani.

Annertunerusumik paasisaqarusunnermi Ilisimatusarnermut Avatangiisinullu Naalakkersuisoqarfimmi pisortaaneq Mette Skarregaard Pedersen tlf.: 346476 / 529844-mut imaluunniit e-mail: mesp@nanoq.gl imaluunniit pan@nanoq.gl aqqutigalugu attaveqarfigineqassaaq.