Jens Immanuelsen: Aalisartut aningaasatigut ikiorserneqarnerat ukioq manna ingerlaqqissanersoq pillugu suliaq aallartinneqareerpoq

- Nuannaarutigalugu KNAPK ilisimatissinnaavara Aningaasaqarnermut Naalakkersuisoqarfillu suleqatigiilluta suleqatigiissitaq corona pissutigalugu aalisarnerup pitsaasumik aningaasarsiorfigiunnaarnerata kingunerisaanik ikiorsiissutinik pisariaqartitsinermik misissuisussaq pilersinneqareermat.

Nammineerlungalu ukiup siuliata naannginnerani kissaatigalugu allaat oqaatigereerpara suleqatigiissitaq pilersinneqaqqittariaqartoq, paasiniarneqassalluni ikiorsiissutit qanoq amerlatigisut 2021-mi pisariaqartinneqassanersut misissorneqassallutik. Taama Aalisarnermut, Piniarnermut Nunalerinermullu Naalakkersuisoq Jens Immanuelsen, KNAPK-ip ilaasortaminut aalisarunnaarsitsiniarluni kaammattuineranut atatillugu Naalakkersuisut sinnerlugit qisuariaateqarluni oqarpoq. KNAPK siorasaaraluni aalisarunnaartoqassasoq Naalakkersuisunit immikkut aalisartunut ikiorsiissutit nangillugit ukioq manna atortinneqaqqissanngippata.

Tassunga atatillugu suleqatigiissitami ilaasortaasimasut decembarip 30-anni 2020-mi saaffigineqareerput, tassungalu ilanngullugu KNAPK nalunaareerpoq suleqatigiissitami peqataaqqissalluni. Tamannalu Naalakkersuisunit naatsorsuutigivarput attatiinnarneqartoq, taamaammallu suleqatigiissitami nalilersuinerit peqataaffigissagaat. KNAPK allatut isummersimassappat, tamanna pillugu ilisimatinneqarsimanngilagut, Jens Immanuelsen naggasiilluni oqaaseqarpoq.

2020-mi suleqatigiissitaq ukunannga ilaasortaaffigineqarpoq: Aalisarnermut, Piniarnermut Nunalerinermullu Naalakkersuisoqarfik, Aningaasaqarnermut Akileraartarnermullu Naalakkersuisoqarfik, KNAPK, Sulisitsisut, aamma Aatsitassanut Inuussutissarsiornermullu Naalakkersuisoqarfik.

Attavigineqarsinnaavoq Aalisarnermut, Piniarnermut Nunalerinermullu Naalakkersuisoqarfimmi pisortaaneq, Jørgen Isak Olsen. E-mail: jio@nanoq.gl