Aasianni Covid-19-imik tunillatsisimasumik nassaartoqaqqippoq

Aasianni Covid-19-imik tunillatsittoqarsimavoq. Pineqartoq Danmarkimit Nunatta Peqqinnissaqarfianut suliartorluni januaarip ulluisa aappaanni tikippoq. Pineqartoq ippassaq januaarip ulluisa pingajuanni tunillatsissimanermik ersiuteqalereersimammat ullumi misissuiffigineqarpoq.

Tunillatsissimasoq Aasiannut tikinnerminut atatillugu sivikitsuaqqamik peqqinnissaqarfimmi sulisut ikittunnguit akornanniissimavoq. Pineqartoq inuit allat akornanniissimanngilaq. Nunatta Nakorsaanerata Politiit suleqatigalugit tunillatsisimasup angalanermini attaveqarfigisimasai misissuiffigileruttorpai.

“Tuniluuttoqarsimanissaanut aarlerinassusaa annikitsuusoq naliliivugut, kisianni soorunami malittarisassat tamaasa massakkut malippavut. Taamatuttaarlu peqqinnissaqarfimmi sulisut tunillatsissimasumut attaveqarsimasut aneqqusaanngikkallarput.”, Nunatsinni Nakorsaaneq Henrik L. Hansen taama oqarpoq.

Uani pineqartumi Aasianni tuniluuttoqarsimanissaanut aarlerinassusaa annikitsuararsuusoq nalilerneqarpoq. Naak ulluni makkunani nunatta avataaniit nunatsinnut angallannikkut aqqutit nalinginnaasut matoqqagaluartut, suli nunatta avataaniit tikittoqartarpoq, taamaammallu nunatsinni tunillatsittoqarsinnaanera annikikkaluartumik periarfissaavoq. Nunatsinni sumiiffinni tamani eqqummaarittoqartariaqarpoq. Innuttaasut ersiutillik tamarmik erngerlutik misissorneqarnissaq siunertaralugu peqqinnissaqarfimmut attaveqassapput. Tamanna pingaartumik angalasunut immikkut atuuppoq, kisianni aamma angalasimasumik attaveqarsimasut tamarmik pineqarput. Angalasimasunik attaveqarsimanngikkaluaraanniluunniit Covid-19-imut ersiutit maliginiarnissaat pingaaruteqarpoq.

Nunatsinni tuniluuttoqannginnissaa iliuuseqapallannikkut pinngitsoortinneqarsinnaavoq.

Kikkut tamarmik innersuussutinik malinninnissaat erseqqissaassutigineqarpoq: Inuit qanillinaveersaakkit, meterinik marlunnik ungasitsigikkit, assamminninnerit eqitaarinerillu pinaveersaartikkit kiisalu assavit asakulanissaat eqqaamajuk.

Misissuineq positiviusoq Covid-19 typimik allamik nutaamik Englandimeersumik ilaqarnersoq aamma misissorneqarumaarpoq. Tamanna misissuineq immikkuullarissoq Danmarkimi ingerlanneqarumassaaq taamaammallu akissut suli ilisimaneqanngilaq.

Paasissutissanik amerlanerusunik perusukkuit Nakorsaaneq Henrik L. Hansen attavigiuk.