12. januar 2021 ilanngullugu tikittussanut mattussineq pillugu

30. decembari 2020-mi nalunaarutigineqarpoq, 12. januaari 2021 ilanngullugu Kalaallit Nunaannut tikittussat tamarmik, taamaallaat inuit inuiaqatigiinni pingaarutilinnik suliallit ikittuinnaat pinnagit mattunneqartut. Kalaallit innuttaasut piffissami covid-19-ip Danmarkimi annertuumik tuniluuffigisaani aamma nunatsinni innuttaasut suli akiuussutissamik kaporneqarfiginngisaanni illersorniarneqarnissaat siunertaavoq.

 

Corona pillugu allattoqarfimmi angalanissanut innersuussinissanullu suliallit ilaasussat tamaasa nussorlugit ulappupput, siulliullutik aallartussat aallarniutigalugit.

 

5. januaarip kingorna angalanissamik inniminniisimaguit/inniminniisimagussi, aammalu sapaatit akunnerata naanerani nalunaarfigineqarsimanngikkuit/nalunaarfigineqarsimanngikkussi imaanngilaq puigoritsigit, kisiannili aallaqqaammut 5. Januaarip tungaanut angalasussat salliuppagut. Piffissami matoqqatitsiviusumi angalanissamik inniminniisimasut pilertornerpaamik nalunaarfigineqassapput.

 

Angalanissat Air Greenlandikkut inniminnikkat:

Inuit Air Greenlandimut toqqaannartumik inniminniisimasut timmisartuutileqatigiiffimmiit toqqaannartumik nalunaarfigineqassapput, aammalu namminneerlutik Air Greenlandimut attaveqassanngillat.

 

Bilitsi inniminnigaq taamaatinneqassappat, imaluunniit ukiup ingerlanerani kingusinnerusumut nuunneqassappat, Air Greenlandip nittartagaani attaveqarnissamut immersugassaq atorneqartariaqarpoq.

 

Angalanissat angallassivitsigut inniminnikkat:

Angalasussat angallassivik aqqutigalugu inniminniisimasut angallassivimmiit attaveqarfigineqassapput. Erseqqissaatigineqassaaq, angalanissat angallassivitsigut inniminnikkat pillugit Air Greenland ikiuussinnaanngimmat. Saaffiginninnerit tamarmik angallassivimmut pissapput.

 

Air Greenlandimit imaluunniit angallassivimmit nalunaarutit angalanissamut pilersaarummik nutaamik imaqartassapput. Tassanilu siulliullutik angalussaagaluit 12. januaarip kingorna timmisartunut siullernut ilaasussanngorlugit nuunneqarnissamut siulliunneqassapput. Timmisartut angalasussat ilaneqassapput, angalasussat pilertornerpaamik angerlamut apuunnissaat isumaginiarlugu, kisiannili misissuisarnerit eqqarsaatigalugit, aammalu tunillatsissimasut, pinngitsooratik siunissami tikiuttartussat mattusimanissaat qulakkeerniarlugu suliassat eqqarsaatigineqassapput.

 

Ilaatinneqanngitsut:

 

Inuit immikkut ittumik pisoqartillugu inuiaqatigiinnut pingaarutilinnik suliaqartussat suliffeqarfik/aaqqissuussaaneq aqqutigalugu tikinnissamut akuersissummik qinnuteqarsinnaapput. Suliffeqarfik/aaqqissuussaaneq immikkut ittumik

akuersissuteqartoqarnissaanik Corona pillugu Allattoqarfimmut qinnuteqassaaq. Suliffeqarfinnut aaqqissuussaanernullu annerusunut tamanut malitassanik suliaqartoqareerpoq. Suliffeqarfik/aaqqissuussaaneq nalunaarummik tigusinngitsoorsimappat, Corona pillugu Allattoqarfimmut saaffiginnittoqassaaq. 

 

Immikkorluinnaq pisoqartillugu inuinnaat siusinnerusukkut angalanissamik qinnuteqarsinnaapput.Tamanna corona.iaan@nanoq.gl aqqutigalugu pissaaq, peqqutaasumut tunngavilersuut aamma angalanissamut pilersaarut siulleq ilanngunneqassallutik. Peqqutaasoq tunngavissaqarluartussaavoq, soorlu ilisineq imaluunniit ilaquttani qaninnerpaami peruluttoqarnera peqqutaasinnaallutik.

 

Tunngaviusumik allannguinernut atatillugu ullunik aallarfissanik immikkut ittunik kissaateqartoqarsinnaanngilaq.

 

Paasissutissat amerlanerusut:

 

Corona pillugu Allattoqarfimmi pisortaq Nels Ulrik Vinther aamma nakorsaaneq Henrik L Hansen