Siunissami niueqatigiinnissamut sinaakkutissat pillugit Tuluit Kunngeqarfiata Peqatigiit Niuernermut Ministeriat Truss Steen Lyngemut allagaqarpoq

Tuluit Irlandillu Avannarliup Kunngeqarfiata Peqatigiit (UK-p) Nunat Tamalaat akornanni Niueqateqarnermut Ministeriat Elizabeth Truss decemberip 22-ani 2020 Nunanut allanut tunngassutilinnut, Nukissiuuteqarnermullu Naalakkersuisumut Steen Lyngemut, maannamut siunissamilu UK-p Kalaallit Nunaatalu akornanni niuernikkut sinaakkutit pillugit allagaqarpoq. Ukioq 2020 naatinnagu UK-p Kalaallit Nunaatalu, nunallumi allat ilanngullugit, ataavartumik isumaqatigiissusiornissartik angumerisinnaannginnerat peqqutigalugu, UK-mi naalakkersuisut utaqqiisaasumik aalajangerput aalisakkanik nioqqutissanut aalajangersimasunut eqqussinermi akitsuutaalersussat kinguartinneqarallassasut nioqqutissanullu allat aalajangersimasunut annertussusilimmik killeqartumik eqqussisoqarsinnaassasoq akitsuutilersorneqaratik. Taamaaliornikkut UK-p Kalaallit Nunaatalu akornanni niueqatigiinnermut akornutaalertussat annikilliimipput nunallu illuatungeriit suliffissuaqarfii iluaqutigisinnaasaannik qulakkeerinnittoqalaarneranik neriuutigineqarpoq. Taamatut aaqqiigallarneq 2021 tamakkerlugu, imaluunnit eqqussinermut annertussutsit aalajangersimasut nungunneqarnissaasa tungaanut atuutsiinnarallassaaq. Nioqqutissiat eqqussuinermi akitsuusiinermit atorunnaarsitsivigineqarallartut tassaapput saarullinnit raajanillu nioqqutit ilai UK-mi suliareqqinneqartartut, Nunatta UK-mut niuerutigisartai akornanniittut.

Ministerip Truss-ip allagai takkupput Naalakkersuisup Steen Lyngep Truss-imut oktoberip 23-ni allagaqareernerata kingorna, tamatumalu kingorna Kalaallit Nunaata UK-mik niueqatigiinnissamut isumaqatigiissutissatut siunnersuutaata novemberip 18-ni 2020 nassiussereernerata kingorna.

Minister Truss-ilu allapportaaq atorfilittani piumaffigisimallugit niueqatigiinnissamut isumaqatigiissutissatut siunnersuut misissoqqissaassagaat, 2021-milu kalaallit atorfilittai suleqatigalugit suliaq ingerlanneqassasoq, taamaalilluni nunat taakku niueqatigiinnikkut attaveqaqatigiinnerup ingerlatiinnarnissaa annertusarnissaalu anguniarneqassalluni.

Naalakkersuisoq Steen Lyngep oqaaseqaataa:
”Saarullinnut raajanullu nioqqutissiarisatsinnut ilaannut eqqussinermi akitsuutit atorunnaarallarsinneqarnissaannut UK-p naalakkersuisuisa aalajangernerat pitsaasuuvoq. Ukiumi nutaami UK-mik niueqateqarnitsinni akitsuutaasut ilai peerallarneqarnissaat iluaquteqassaaq niuerutigisatsinnut ilaannut qulakkeerinneqataassalluni. Suli anguniagarput angunngilarput, taamaalilluni suli suliassaqarpugut neriuutigisatsituut UK-p Nunarpullu akornanni ukiumi nutaami ataavartumik niueqatigiinnissamik isumaqatigiissuteqarnissatsinnut tungaanut, UK-p EU-mi niueqatigiinnermut sinaakkutinit aninerata kingunerisaanik. UK-llu suleqatigiinnerput nanginnissaa qilanaaraarput, maluginiarparpullu tulunnit Nunarpullu akornanni suleqatigiinnerput ineriartortinnissaa kissaatigineqarmat.”

Minister Truss-ittaaq allakkamini oqaatigaa Kalaallit Nunaannut attaveqarnertik UK-mut pingaaruteqartuusoq, akuttunngitsumillu atorfilittaminit piumaffigilernikuullugit Kalaallit Nunaannik niueqateqarnikkut eqqartueqatigiinneq qanoq ingerlanersoq paasissutissanik nutaanik tunineqartarnissamik piumasaqarsimalluni Kalaallit Nunaanni niueqatigiinnermi ingerlatsinerup attatiinnarnissaa nukittorsarnissaalu qulakkeerumallugu.


Annertunerusumik paasisaqarusukkussi attavigisinnaavarsi: Mininnguaq Kleist, Sinniisoqarfiup pisortaa, Email: mikl@nanoq.gl , Mobil: +32 499999858