Naalakkersuisut 2021-2023-mut suliffeqarnermut periusissiaat

’NUTAALIORNEQ, PERIARFISSAT, PIGINNAASAT’ Naalakkersuisut 2021-2023-mut suliffeqarnermut periusissiaat

Naalakkersuisut 2021-2023-mut suliffeqarnermut periusissiaat maannakkut tamanut saqqummiunneqarpoq, Naalakkersuisullu nittartagaanniilerpoq.

NUTAALIORNEQ, PERIARFISSAT, PIGINNAASAT atorlugu periusissiaqarfimmi 2021-2023-mi suliffeqarnermik suliassaqarfimmi Naalakkersuisut suliaasa sammivissaat inissipparput. Suliffeqarnermut periusissiap sammisai tassaapput immikkoortoqarfiit aningaasaqarnikkut siuarsaasinnaasut – aammalu siuarsaajuartussat – ineriartortinnissaat. Taamaalillutik aningaasaqarneq assigiinngiiaarnerullunilu piujuartitsinerusoq, suliffeqarfiillu amerlanerusut ineriartortitaassapput.

Tamatumunnga ilaliullugu inuusuttut suliffissaaleqinerisa annikinnerpaap qulakkeernissaa Naalakkersuisut qitiutillugu anguniarpaat. Inuusuttut meeqqat atuarfiata kingornatigut siunissami periarfissaat nukittorsarlugillu pitsanngorsarniaraanni ilinniagaqarfimmi suliffeqarnermilu suliassaqarfinni anguniagaqarfilittut iliuuseqarnissaq pisariaqarpoq.

Periusissiaqarfiup nalaani tassani nunatsinni inuiaqatigiinnut tunngasutut tamaviaarfigisat annerpaat ilaata, suliffissaaleqinerup, iluarsiiviginiarnera pingaartinneqarpoq. Iliuuserisanik assigiinngiiaarnerusunik tamanna pisariaqartitsivoq, taamaattumillu anguniakkanik makkuninnga iliuuseqarfiusussat aallaaveqassapput:

Anguniagaq 1 Inuussutissarsiutit sammiviinik amerlanerusunik ineriartortitsisoqassaaq, aningaasarsiornikkut siuariartorsinnaaqqulluta suliffissanillu pilersitsiortorluta
Anguniagaq 2 Inuusuttuaqqat inuusuttullu suliffissaaleqinerat malunnaa
tilimmik annikinnerulersinneqassaaq
Anguniagaq 3 Nunap immikkoortuini suliffissaqartitsinikkut suliniutit nunami tamarmik suliffissaqarnermik annerusumik pilersitsiviussapput
Anguniagaq 4 Suliffeqarfiit sulisussallu piginnaasaasa akornanni tulluarsaasoqasaaq.

”Naalakkersuisut, kommunit aamma suliffeqarfimmi illua’tungeriit akornanni suliaqarfigisat qaangerlugit suliaqarnissarput pingaartuuvoq, taamaalilluta inuiaqatigiinnut tamarmiusunut iluaqutaasussanik ilinniagaqarnerup, suliffeqarfiup inuussutissarsiorfiullu akornanni sunniivigeqatigiinnikkut sapinngisamik pitsaanerpaamik sunniutaasussaq pissarsiarissagatsigu,” Suliffeqarnermut, Ilisimatusarnermut Avatangiisinullu Naalakkersuisoq Jess Svane oqarpoq.

Naalakkersuisoqarfimmi pisortamut paasissutissat saaffiginnissutigineqarsinnaapput, Isak Nielsen Kleist, isiin@nanoq.gl