Kigutinut narlorsaatinik katsorsaaneq 2021-mi aallarteqqinneqassaaq

2021-miit aalajangersimasumik atuuffimmut naleqquttumik pisariaqartitsisoqassappat, meeqqat inuusuttullu kigutinik narlorsaatinik katsorsarneqarnissaminnut periarfissaqaqqilissapput. 

Katsorsaanissamik neqeroorut meeqqat peqqinnissaq pillugu katsorsarneqarnissamut pissutissaqarsorineqartut assigiissaakkamik piffissaagallartillugulu toqqarneqarnissaanik qulakkeerinninniarluni innersuussisarnermut piumasaqaatit pisortatigoortut aallaavigalugit atuutissaaq. 

 

Meeqqanut inuusuttullu taamatut pisariaqartitsisut kigutinut narlorsaatinik katsorsaanissamik neqerooruteqarsinnaanermi piumasaqaataavoq, katsorsaanernut malitseqartitsiniarnerup pisariaqartinneqartup isumaginissaanut sumiiffinni ilinniarsimassutsikkut isumalluuteqarfiusuni katsorsaanerup ingerlanneqartarnissaa. Tamatumunnga pissutaavoq naapertuutinngitsumik katsorsaasarnissamut aarleqqutaasinnaasunik annikillisaanissaq.  

Peqqissutsimut Naalakkersuisoq Anna Wangenheim ima oqarpoq:

”Kigutinut narlorsaatinik katsorsaasarnissamik periarfissaqartoqaqqilernera nuannaarutigaara. Kigutinut narlorsaatinik kikkut katsorsarneqarnissaminnut neqeroorfigitissinnaanerannut atatillugu saqqummiussatsinni oqaatiginikuuarput, meeqqat inuusuttullu kigutaasa atuuffissaraluaminnit kukkusumik inissisimasut katsorsarneqarnissaannik neqerooruteqarnissaq annertunerusumik ukkatarineqarumaartoq.  Taamaattumik isikkorinnissaq anguniarlugu narlorissartinnissamut neqerooruteqarnissaq periarfissaanavianngilaq.”

2021 allartinnerani neqeroorummik aallartitseqqiinissamut piffissamut pilersaarusiaq nassiunneqarumaarpoq.

Narlorsaatinut neqerooruteqartarnermut ilanngunniarneqarnissamik qinnuteqartoqarsinnaanavianngilaq. Najukkami kigutit nakorsaa aammalu kigutip nakorsaata immikkut ilisimasalik peqatigalugu, meeqqat inuusuttullu sorliit narlorsaatilertinnissaanut neqeroorfigineqarsinnaanerannik, nalinginnaasumik misissuinernik ingerlatsisassaaq.  

 

Paasisaqarnerorusuttut Immikkoortortami pisortaq Martin Pedersen, oqaras.:+299 34 66 18-mut, imaluunniit mrpd@nanoq.gl -ikkut attaveqarsinnaapput.