Inuussutissat ulluliinernik qaangiisimasut tuniniarneqarnissaannut inerteqquteqartitsinermi mininneqartut

Inuussutissat pillugit Inatsisartut inatsisaanni nr. 24, 28. november 2019-imeersumi § 6, imm. 3 naapertorlugu inuussutissat ulluliinernik qaangiisimasut tuniniarneqarsinnaanerat pillugu inerteqquteqartitsinermit mininneqarnissaat aalajangersaaffigineqarput.  Malittarisassat tamakku nalunaarut nutaaq aqqutigalugu aalajangersaaffigineqarput, tassanilu sikuunerani innuttaasut sikusartuniittut inuussutissanik pissarsisinnaanissaat qulakkeerniarneqarluni.

Suliffeqarfiit inuussutissanik nioqqutillit qinnuteqareernermikkut inuussutissanik ulluliinernik qaangiisimasunik tuniniaanissaminnut immikkut akuerineqartarnerat siusinnerusukkut ileqquusimavoq. Inatsimmik allannguisoqarnera pissutaalluni periarfissaq tamanna atorunnaarpoq, paarlattuanillu malittarisassat nalunaarut nutaaq aqqutigalugu aalajangersaaffigineqarput. Taamaalilluni sikunissaanut inerteqqummit immikkut ittumik akuerineqarnissamik qinnuteqartarnissaq pisariaaruppoq.

 

Inuussutissaq "ulloq una tikillugu atasinnaavoq"-mik imaluunniit "ulloq una nallertinnagu tunineqassaaq"-mik nalunaaqutserneqarsimappat aamma inuussutissaq ulluliinerup kingorna peqqinnissamut ulorianartuunnginnera nioqqutissiortumit uppernarsarneqarsinnaappat ulluliinerup kingorna tuniniarneqarsinnaavoq.  Inuussutissat "ulloq atorneqarfissaa kingulleq"-mik nalunaaqutsikkat amerlanertigut asiujasut ulluliinerup kingorna nerissallugit ulorianarsinnaammata ulluliinerup kingorna tuniniaqqusaanngillat.

 

 

 

 

Paasissutissanik suli allanik, uani taaneqanngitsunik pissarserusukkaanni Aalisarnermut, Piniarnermut Nunalerinermullu Naalakkersuisoqarfimmut saaffiginnittoqarsinnaavoq, e-mail: apnn@nanoq gl apnn@nanoq.gl.

 

Sukumiinerusumik paasisaqarusukkaanni Uumasut nakorsaanerat Egill Steingrimsson attavigiuk, oqarasuaat 34 53 23, e-mail: uumasut@nanoq.gl